भांगरभूंय | प्रतिनिधी
पणजी : गिरीश चोडणकार हांणी फाटल्या वेंचणुकांनी कोट्यांनी रुपयांची तिकेट विकल्या. ईशान्य राज्यांनी आनी तमिळनाडूंतय तांणी तशें केलां. तेन्नाचे गोंय प्रभारी गुंडूराव हांणीय ताचे कडल्यान पयशे मागिल्ले. अशे परिस्थितींत वेंचणुकेच्या आदल्या दिसा कॉंग्रेस पक्षान गिरीश चोडणकार हांची राज्य अध्यक्ष म्हणून नेमणूक करप सामकें चुकीचें. राज्यांतल्या विरोधी पक्षांत गटबाजी आशिल्ल्यान आमी तिसरी आघाडी करपाचो निर्णय घेतिल्ल्याचें आदले मंत्री मिकी पाशेको हांणी सांगलें. सोमारा पणजे जाल्ले पत्रकार परिशदेंत ते उलयताले.
२०२२ वर्सा चोडणकार हांणी ह्या पदाचो राजिनामो दिल्लो. खरें म्हणल्यार ते उपरांत तांणी स्वयंसेवी निवृत्ती घेवपाक जाय आशिल्ली. पूण आतां त्याच मनशाक परतून पद मेळ्ळां. चोडणकार हे कॉंग्रेस पक्ष तशेंच गोंयचो नाश करतले हें निश्चीत आसा. ते तमिळनाडूचे प्रदेश अध्यक्ष आसतना थंयच्या कॉंग्रेसीच्या पदाधिकार्यांनी चोडणकारा आड केंद्रीय फुडार्यां कडेन कागाळ केल्ली. थंययूय चोडणकार हांचेर तिकेट विकपाचो आरोप जालो. तेन्नाचो प्रभारी गुंडूराव हांणी म्हाका पाटो हांगच्या वेंचणूक कार्यालयांत आपोवन म्हजी अर्थीक स्थिती विचारिल्ली. ताका म्हजे कडल्यान पयशे जाय आशिल्ले, अशें पाशेको हांणी मुखार म्हणलें.
आमी कॉंग्रेस पक्षांत नासले तरी धर्मनिरपेक्ष पक्ष म्हणून आमी सदांच कॉंग्रेसीक तेंको दिला. फाटल्या वेंचणुकांनी आमी पक्षाचे उमेदवार वेंचून येवपाक वावुरल्यात. पूण पक्षान लोकांच्या विस्वासाचो गैरवापर केला. आयज गोंयांतल्या दरेका पक्षांत गटवाद चलता. राज्यांतल्या विरोधी पक्षांमदीं एकवट ना. देखूनच आमी तिसरी आघाडी तयार करतले. हे संबंदी निर्णय बेगीन जाहीर जातलो. फकत साश्टींत न्हय तर पुराय गोंयांत पक्षाचें काम सुरू जातलें. बरो समाजीक वावर करपी लोकांक तिकेट दिवपाचो आमी विचार करतात, अशें पाशेसो हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
