भांगरभूंय | प्रतिनिधी
वास्को : ज्या कामगारांच्या सुखा-दुख्खांत वांटेकार जालो, त्याच कामगारांनी धनयाचो विस्वासघात करून ताचो खून केल्ल्याची धक्को दिवपी घडणूक वास्कोच्या खारीवाडो वाठारांत उक्तडार आयली. सभावान सामके मनमेकळे, शांत आनी आपल्या वेवसाया कडेन प्रामाणीक आशिल्ले थळावे बोट धनी मंजुनाथ हरिकांत हाचो तांचेच बोटीर काम करपी ओडिशांतल्या कामगारांनी खून केलो आनी ताची कूड दर्यांत उडयली. ह्या फिल्मी स्टायलीन घडिल्ले घडणुकेक लागून पुराय नुस्तेंमार भावां मदीं भंयाचें वातावरण निर्माण जालां.
हे विशीं मेळिल्ले चड म्हायती प्रमाण, मंजुनाथ हरिकांत हे सदां भशेन ओडिशाच्या कांय कामगारांक वांगडा घेवन नुस्तेंमारी खातीर दर्यांत गेल्ले. मात, ह्या प्रवासा मजगतीं धनी आनी कामगारां मदीं बारीकश्या कारणाक लागून वाद जालो. ह्या वादाचें रूपांतर झगड्यांत जालें. कामगारांनी एकठांय येवन मंजुनाथ हांचे तकलेर जड वस्तून नेटान वार केलो. हो हल्लो इतलो नेटान आशिल्लो, हातूंत मंजुनाथ हाका जाग्यारूच मरण आयलें. उपरांत स्वताचो गुन्यांव लिपोवपा खातीर दुबावितांनी मंजुनाथ हाची कूड दर्यांत उडयली.
धक्को दिवपी गजाल म्हणल्यार, हाचे उपरांत तांणी नुस्तेमारीची बोट सामके शांत तकलेन दर्यादेगेर हाडली आनी जेटीचेर हाडून उबी केली. जशें कितेंच घडूंक ना अशें दाखोवन आपापलीं बॅगां घेतलीं आनी आपल्या गांवांत पळ काडलो.
१ जून सावन मान्सून काळांतली नुस्तेंमारी बंदी लागू जाल्ल्यान दर्यादेगेर खुबश्यो बोटी उब्यो आसात. सुरवातेक कोणाकीच दुबाव येवंक ना. मात, दर्यांत एक बेवारस कूड हुबतना दिशिल्ल्याची बातमी सगळ्याक पातळ्ळी. थळाव्या नुस्तेंमार्यांनी शिटुकसाण दाखयली. ती मंजुनाथ हांची आशिल्ल्याचें स्पश्ट जाले उपरांत सरळ दुबाव तांच्या बेपत्ता कामगारांचेर गेलो.
हे घडणुकेन गोंयच्या बिगर गोंयकार कामगारांच्या पुलीस व्हेरिफिकेशनाचो सामको गंभीर प्रस्न परत मुखार आयला. जर ह्या कामगारांची नोंद पुलीस स्टेशनाचेर आशिल्ली जाल्यार आयज पुलीस तांकां रोखडेच धरतले आशिल्ले. सध्या पुलिसांनी घडणुके सुवातेर वचून ह्या प्रकरणाचो तपास करपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
