भांगरभूंय | प्रतिनिधी
नवी दिल्ली: आयच्यान म्हळ्यार १ जून सावन वेवसायीक सिलिंडर ५३.५० रुपया मेरेन म्हारग जाला. दिल्लींत तो ३११३.५० रुपयांनी मेळटा. ५ किलो एफटीएल सिलिंडराचें मोल ११ रुपया वाडयलां, ही वाड जाले उपरांत आतां ‘ल्हान’ सिलिंडराचें मोल ८२१.५० रुपया जालां. हाचे भायर पेट्रोल, डिझेल आनी एटीएफ हांचेर नवो निर्यात कर उणो करपाची पद्दत आयच्यान लागू जाल्या.
तेल कंपनींनी वेवसायीक गॅस सिलिंडर ५३.५० रुपयां मेरेन म्हारग केल्यात. दिल्लींत ताची किंमत ३११३.५० रुपया जाल्या. ह्यान पयलीं हे सिलिंडर ३०७१.५० रुपयांनी मेळटाले.
वेवसायीक सिलिंडरांचें दर वाडिल्ल्यान रेस्टॉरंट मालकांचो खर्च वाडटलो. अशे परिस्थितींत तांकां च्या, नाश्तो आनी थाली खातीर चड शुल्क घेवचे पडटले. लग्नांत बुफे दवरप लेगीत खर्चीक जावंक शकता.
४ मुखेल शारांनी वेवसायीक गॅस सिलिंडरांचें दर
शार – नवी किंमत – आदली किंमत -फरक
दिल्ली – ३११३.५० – ३०७१.५० – ४२.००
कोलकाता – ३२५५.५० – ३२०२.०० – ५३.५०
मुंबय – ३०६७.५० – ३०२४.०० – ४३.५०
चेन्नय – ३२८३.०० – ३२३७.०० – ४६.००
एफटीएल सिलिंडराचें दर ११ रुपया वाडून ८२१.५० रुपया जालां. हाचे पयलीं ताची किंमत ८१०.५० रुपया आशिल्ली. ५ किलो घरगुती सिलिंडराची किंमत अजूनय ३३९ रुपया स्थीर आसा. एफटीएल सिलिंडराक ‘छोटू’ सिलिंडर अशेंय म्हण्टात, जो नाम्याचो पुरावो नासतना कोणाकूय विकतें घेवंक मेळटा. हो छोटू सिलिंडर मुखेलपणान स्थलांतरीत मजूर, विद्यार्थी वा ल्हान दुकानदार वापरतात.
घरगुती सिलिंडर मात तसोच आसा. ताच्या दरांत वाड जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
