भांगरभूंय | प्रतिनिधी
आदल्या तेंपार एखादो विद्यार्थी ट्यूशनाक (शिकवणी) गेलो काय ताची फकांडां करताले, पूण आयज परिस्थिती पूर्णपणान बदलल्या. आज विद्यार्थी शिकवणेक वचूंक शकना जाल्यार ताची थट्टा, मस्करी करतात, इतलो बदल आयचे शिक्षण पद्धतींत जाला. आजकाल चडशे हुशार विद्यार्थी फक्त अभियांत्रिकी वा वैजकी फाट्यांच्या फाटल्यान धांवतात आनी आकर्षक ‘पॅकेज’च्या फाटल्यान. पूण, भारताच्या ‘इस्रो’ (ISRO) सारख्या जागतिक दर्जाचे संस्थेंत आमचे विद्यार्थी कित्याक दिसनात, असो प्रश्न म्हाका नेमान पडटा.
भारताची अंतराळ भरारी
इस्रो ही भारताची अंतराळ संशोधन संस्था 1969 वर्सा स्थापन जाली. डॉ. होमी भाभा हांचे सपन आनी पंडित जवाहरलाल नेहरूंच्या कार्यकाळांत तिची बुन्याद पडली. आयज इस्रोचे सकयल 15 परस चड उपसंस्था देशभर वावुरतात. रशियेचे मजतींन ‘आर्यभट्ट’ आनी ‘भास्कर’ हे उपगीरे (Satellites) सोडून, 1980 सावन भारतान स्वदेशी बनावटीच्या उपग्रहां वरवीं अंतराळांत व्हड झोपय घेतली. आयज भारत फक्त स्वताचेच न्हय, तर संवसारांतल्या हेर देशांचेय उपगीरे अंतराळांत धाडून आपली ताकद सिद्ध करता.
‘युविका’ शिबीर
विद्यार्थ्यांची अंतराळ विज्ञाना विशींची रुची वाडची, हे खातीर इस्रो ‘युविका’ (YUVIKA – Yuva Vigyani Karyakram) नावाची 15 दिसांची निवासी कार्यशाळा आयोजित करता. हें पूर्णपणान फुकट शिबीर आसा. विद्यार्थ्यांचो येवपा- वचपाचो प्रवास, रावपाचो आनी जेवपाचो खर्च इस्रो स्वता करता. जे विद्यार्थी णववेंत शिकतात, ते ह्या शिबिरा खातीर पात्र आसतात. ते खातीर आठवेचो निकाल, एनसीसी प्रमाणपत्र, खेळांतलो सहभाग, विज्ञान सर्तींतली प्रमाणपत्रां हें सगलें सांबाळून दवरात. तुमची कामगिरी जितली प्रभावी तितली तुमची निवड जावपाची शक्यताय चड.
गोंयकार विद्यार्थ्यांची भरारी:
ही निवड प्रक्रिया सामकी कडक आसता. तरीय, फाटल्या 4 वर्सांत गोंयांतल्या सरकारी शाळेंतल्या विद्यार्थ्यांनी जैत जोडलां, ही अभिमानाची गजाल. खास करून ‘दाडाची वाडी’ हांगाचे सरकारी शाळेंतल्या विद्यार्थ्यांची कामगिरी तुस्त करपा सारकी आसा.
ओंकार प्रदीप कांबळी, स्नेहद मयेंकार, अविनाश वसंत कोळंबकार आनी ह्या वर्सा चिन्मय मिलिंद गणपुले ह्या विद्यार्थ्यांनी ह्या शिबिरा खातीर वेंचून येवन गोंयचें नांव वयर काडलां. ह्या विद्यार्थ्यांच्या यशा फाटल्यान तांचे शिक्षक वसंत कोळंबकार हांचो मोलाचो वांटो आसा. ताणीं फक्त विद्यार्थ्यांचो अभ्यासच घेवंक ना, तर इस्रोचे वेबसायटी वयल्यान म्हायती मेळोवन तांकां हे संधीची वळख करून दिली. तशेंच आनंद केळकर हांचेंय ह्या कामांत सहकार्य लाबलां.
विद्यार्थ्यांक आवाहन
जर हे विद्यार्थी सरकारी शाळेत शिकून इस्रो सारके प्रतिश्ठीत संस्थे मेरेन पावपाक शकतात, तर हेर शाळेंतले विद्यार्थी कित्याक नात? ताका लागून, ज्या विद्यार्थ्यांक अंतराळ विज्ञानांत रस आसा, ताणीं विज्ञाना वांगडा भौतिकशास्त्र (Physics) आनी सामान्य ज्ञानाचो खोल अभ्यास करचो. जर तुमकां ह्या शिबिरा विशीं चड म्हायती जाय जाल्यार, तुमी सकयल दिल्ल्या नंबरांचेर संपर्क सादूं शकतात:
युरेका इंडिया: 9604505891, चिन्मय गणपुले: 9326128090. हुशार विद्यार्थ्यांनी हे संदीचो नक्कीच लाव घेवचो आनी आपल्या स्वप्नांक ‘इस्रो’ची जोड दिवची!
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
