भांगरभूंय | प्रतिनिधी
वाळपय: भलायकी मंत्री विश्वजीत राणे हांणी कॉंग्रेस सोडल्या उपरांत वाळपय मतदारसंघांत पक्ष सांबाळपाचो यत्न करपी दोन मुखेल फुडार्यांनी राजीनामे दिल्ल्यान कॉंग्रेसींत बरोच बोवाळ जाला. प्रदेशाध्यक्षपदाचेर अमित पाटकर हांचे सुवातेर गिरीश चोडणकार हांची जाल्ली नियुक्ती हे फाळणीचें मुखेल कारण थारलां.
प्रदेश कॉंग्रेसच्या सरचिटणीस पदाचेर आशिल्ले मनीषा उसगांवकार आनी प्रदेश कार्यकारिणीचे वांगडी रणजीत राणे हांणी आपल्या पदांचो राजीनामो दिला.
संघर्शाच्या काळांत पक्ष सांबाळ्ळो
विश्वजीत राणे हांच्या पक्षांतरा उपरांत वाळपय मतदारसंघांत कॉंग्रेस दुबळी जाल्ली. अशा कठीण काळांत रणजीत राणे हांणी फाटल्या १० वर्सां सावन पक्षाची धुरा सांभाळली. विधानसभा, जिल्ला पंचायत आनी लोकसभा वेंचणुकेंत पक्षाचें अस्तित्व सांबाळपाचो तांचो वांटो मोलाचो आशिल्लो. जिल्लो पंचायत वेंचणुके वेळार उमेदवार मेळप कठीण आशिल्लें, तरी तांणी सगळ्या वाठारांनी उमेदवार उबे करून पक्षाची उपस्थिती राखली.
भावनां कडेन आडनदर
राजीनाम्या फाटल्या कारणां विशीं उलयतना रणजीत राणे हांणी, प्रदेशाध्यक्ष बदलतना पक्षान कार्यकर्त्यांच्या भावनां कडेन आडनदर केल्या. दक्षिण गोंयचे खासदार कॅप्टन विरियातो फर्नांडीस हांकांय ह्या निर्णयाची पूर्वकल्पना नाशिल्ली.
मनीषा उसगांवकार हांणी लेगीत पक्षाच्या संघटनात्मक निर्णयांत कार्यकर्त्यांक विश्वासांत घेवंक ना. हें दुःख व्यक्त करत सरचिटणीस पदाचो राजीनामो दिला. वाळपय भलायकी मंत्र्यांक राजकीय आव्हान दिवपांत तांची भुमिका मोलाची आशिल्ली.
या राजीनाम्यां उपरांत वाळपय मतदारसंघांत कॉंग्रेसचें फुडें कितें जातलें, हाचेर चर्चा सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
