भांगरभूंय | प्रतिनिधी
कल्याण: कुटुंबाचो विरोध आसून लेगीत दुसर्या जातीच्या तरणाट्या कडेन लग्न जाल्ले २२ वर्सां पिरायेच्या चलयेचो तिच्या बापायन धारदार शस्त्रान खून केलो. ही घडणूक मुंबय लागसारा कल्याण पश्चिमेकडल्या पारेकरवाडी हांगच्या रचना रॉयल इमारतींत घडली. खून केले उपरांत पळून गेल्ल्या त्या बापायक फकत कांय वरां भितर तंत्रीक चवकशेच्या आदाराचेर पुलिसांनी अटक केली. खुनाचें कारण आयकून पुुलीस प्रशासनाकय धक्को बसलो.
पुलिसांक मेळिल्ले म्हायती प्रमाण, बापायचें नांव विनोद वसयकर आनी चलयेचें नांव गायत्री वसयकर. गायत्री दुसर्या जातीच्या तरणाट्याच्या मोगान आशिल्लें. ह्या आंतरजातीय संबंदांक वसयकर घराण्याचो खर विरोध आशिल्लो. गायत्रीचें लग्न करपाक कुटुंबान जायत्यो सोयरीगती हाडल्यो, दोन फावटीं लेगीत तिच्या लग्नाची पुराय तयारीय केल्ली. पूण मोगान आशिल्ल्या गायत्रीन हीं लग्नां न्हयकारलीं.
निमाणें कुटुंबाचो विरोध आनी समाजीक चेंपणाची पर्वा करिनासतना तिणें आपल्या इश्टा वांगडा न्यायालयांत लग्न केलें. लग्न जाल्या उपरांत ती आपल्या घोवा वांगडा सुखान रावताली, पूण तिणें घेतिल्ल्या ह्या निर्णयाचो सूड घेवपाचो उजो विनोद वसयकाराच्या मनांत पेट्टालो.
कांय दिसां आदीं गायत्री आपल्या आवयच्या घरा म्हळ्यार पारेकरवाडी कांय वैयक्तीक कामां खातीर आयिल्ली. खूनाच्या दिसा जेवण सोंपतकच तिच्या लग्नाच्या प्रस्नाचेर परत एक फावट बापूय आनी धुवे मदीं खर झगडीं जालीं. वाद इतलो खर जालो की रागान विनोदान घरांतल्यान सुरो हाडून धुवेचेर मारलो. ह्या भिरांकूळ हल्ल्यांत गंभीर जखमी जाल्ली गायत्री रगताच्या कोंडांत जमनीर कोसळ्ळी आनी थोड्याच वेळा भितर थंयच तिका मरण आयलें. धुवेक मरण आयिल्लें पळोवन बापायन थंयच्यान पळ काडलो.
हे घडणुकेची म्हायती मेळटाच कल्याण पुलिसांनी रोखडोच घडणुके सुवातेर येवन पंचनामो केलो. पुलिसांनी बेगोबेग चवकशी सुरू करून तंत्रीक विश्लेशण, मोबायल लोकेशन आनी गुप्त म्हायतीच्या आदाराचेर फरार जाल्ल्या विनोदाक अटक केली. ताणें पुलिसांक सांगलें, तिणें त्या चलयेक मारली कारण तिणें कुटुंबाची प्रतिश्ठा इबाडल्या आनी आंतरजातीय लग्न केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
