साहित्य सुचना: लिखाण आनी बरोवपी सदांच जियेता

भांगरभूंय | प्रतिनिधी

बरोवपी मरना कित्याक ताचें लिखाण सदांच तिगता आनी बरोवप्यांतल्यान बरोवपी समाजांत जिवो उरता.

लिखणी ही एक कला आनी कला आकारून हाडूंक दरेका बरोवप्याक एक आव्हान. एक बरोवपी, आपल्या बरोवपांतल्यान जायतें घडोवन हाडूंक शकता. बदल हाडूंक लिखाण एक हतयार. बरो बरोवपी जातलो जाल्यार भाशा बऱ्या तरेन जाणून घेवन, भाशेचेर प्राविण्य आसूंक फावो. उतरांचो बडबड केलो म्हूण बरोवपी जायना. पूण तींच उतरां प्रमाण रितीन मांडून, सादारण वाक्यां घडून हाडटात तेन्ना वाचप्यांचेर प्रभाव पडटा. एक बरोवपी वेळाचो बरो उपेग करता. आनी वेळ इबाडिनासतना, आपूण कितलोय वावरांत गूल्ल आसल्यार पासून वेळ काडून आपलें लिखाण करता. शिक्षण केन्नाच सोंपना. बरोवपी एक शिकपी आनी जिवीतभर ताचें शिक्षण चालूच उरता. एका बरोवप्याक थीरपणाचो , सासणीकायेचो समाजकायेचो तशेंच बऱ्या आनी वायट हाचे मदीं अंतर करपाचो गूण आसूंक फावो. बदलणी हाडूंक बरोवप्यान लिखाण सुरू करूंक जाय. कित्याक उतरांचें बळान एका बरोवप्यान वाचप्यांचें मन बदलूंक जाता. आनी समाजांत बदलणेचो दूत जावंक शकता. बरोवपी मरना कित्याक ताचें लिखाण सदांच तिगता आनी बरोवप्यांतल्यान बरोवपी समाजांत जिवो उरता. दर्जेदार बरोवपी जावंक कांय सुचनां मनांत दवरूंक गरज आसा.
बरोवपाचो मोग
महान बरोवपी जातलो जाल्यार लिखाण करूंक इत्सा आसूंक जाय आनी बरोप्यांचो मोग काळजांत थावन भायर सरूंक फावो. मना काळजांतल्यान जें कितें येता. तें फळादीक जाता. बरोवप्यांची इत्सा, विचार निर्माण करता. एक बरो बरोवपी जावंक चिंतपाची तरा म्हत्वाची. मनीस चिंतनां जाल्यार बरें बरोवपी निर्माण जायना. मनशाच्या मनाची आकारणी जाता तेन्ना चिंतपाची तरा अदीक वाडटा. आनी आपल्या मनाच्या बळान एक मनीस दर्जेदार बरोवपी जावंक पावता.
वाचपाची आवड
एका बरो बरोवपी जातलो जाल्यार जायतें वाचूंक जाय आनी वाचपांतल्यानूच एक बरो बरोवपी घडून येता. वाचन करून एक बरोवपी आपली उतरावळ वाडयता, लिखाण करूंक शिकता आनी आपलें गिन्यान वाडोवन, जाणवायेचीं थिकां आपल्या बरोवपांतल्यान वाचप्यां मेरेन पावयता. दरेक बरोवपी आपलें बरोवप करतना सोद वावर करता जायत, एका बरोवप्याक सोद वावराची कला आसता. तेन्ना प्रमाणीक, प्रभावीत, इतिहासीक आनी उपेगाक पडटलें लिखाण वाचप्यां मेरेन पावता.
सुदारप आपणावपाचें मन
एका दिसान बरोवपी जायना, आनी एक फावटीं नामना जोडली म्हूण बरोवपी सदांकाळ म्हान वर्तना. केन्नाय व्हड बरोवपी जावं, पूण दर बरोवपांत सुदारणां करूंक एक बरोवप्याचें मन जावंक जाय. दर दिसा सुधारणी करूंक बरोवप्यान उगतें मन दाखोवंक गरज. एक बरो बरोवपी आपल्या गिन्यांतल्यान कागदाचेर छापून हाडटा. जाणवायेचीं मोतयां बरोवप्यांतल्यान वाचप्या मेरेन पावतात. तेन्ना सुधारणेचीं, उजवाडाचीं किर्णां निर्माण जातात.
बरो सभाव आनी शिस्त
बरो बरोवपी जातलो जाल्यार ताचो सभाव बरो आसूंक जाय. ताची वागणूक, ताचे गूण आनी ताची चिंतपाची तर वाचप्यां मानून घेवंक जाय. बरे शिस्तीन एक बरोवपी वागता, तेन्ना आपल्या बरोवपांतल्यान वाचप्यां मेरेन पावता. सर्जनशीलताय एका बरोवप्याची कला, सृजनशील लिखाण सगळ्यांक आवडटा. आनी बरोवपी सगळ्यांचे आवडीचो जाता. सृजनशील विचार वाचप्यांचेर प्रभाव हाडटा.
संपर्क करपाच कला
लिखाण करप म्हळ्यार वाचप्यां मेरेन संपर्क करप. एका बरोवप्यांक संपर्क करपाची कला गरजेची . बरयिल्लें वाचप्यांक समजूंक जाय. आनी वाचप्याक जाणून घेवन आपलो संदेश दिवंक जाय. तेन्नाच त्या बरोवपांतल्यान बरेंपण निर्माण जाता.
दरेका बरोवप्यान पयलो आपुणूच समिक्षक जावन आपल्या बरपांवळीचेर लक्ष घालूंक फावो. एक फावट बरोवपी जालो म्हणटकच बरोवप्यान टीका मानून घेवंक उगतें मन दाखोवंक फावो. बरो बरोवपी ल्हान वस्तुंचेर लक्ष दवरता. आपलें लिखाण परत – परत तपासता. दुसऱ्यांच्यो सुचोवणी आपणायता. आनी बरयिल्लें पयले सुवातेर आपल्या जिवितांत पाळटा. येसस्वी बरोवपी सदांचे आपली वाड करता. नवी म्हायती आनी जाणवाय आपणायता. आनी आपले कुवती प्रमाणें दर्जेदार बरोवप वाचप्यां मेरेन पावयता. म्हज्यान जाता आनी हांव करतां. असल्या भरवंश्यान आनी आत्मविश्वासान दर एक बरोवपी फुडें सरता. आनी यत्न करून बरोवपाची कला सुदारता. तेन्ना तो बरोवपी दर्जेदार जावन सदांकाळ जिवो उरता.

फादर मायरन जेसन बार्रेटो
9923539749