भांगरभूंय | प्रतिनिधी
दोतोर, म्हाका तुमची मात्शी हेल्प जाय आशिल्ली – खंयचे तरी सांजवेळेर एखादे कार्यावळींत मेळटकत वा फोन करून हांवें उलयिल्लीं हीं उतरां आयकुन धीर गंभीर आनी वजनदार आवाजांत फोंडेचे डॉ. केतन भाटीकार हांची जाप थारिल्ली आसताली, ‘सांग मरे.. फाल्यां सकाळीं ऑफिसांत यो. उलोवया.’ जायते फावटी ते थंयचे थंयच ते सुवातेरच तांकां समस्या वा प्रस्न सांगलो काय उपाय सांगताले. ना जाल्यार दुसरे दिसा दाग- फोंडेंच्या कचेरेंत मेळपाक आपयताले. लोकांक मजत करपा फाटल्यान राजकी व्यक्ती म्हूण वा ‘पब्लिक फिगर’ म्हूण स्वताक दाखोवपाचो अहंकार नाशिल्लो. लोकनेतो म्हूण प्रसिद्धीक लागून स्टंटबाजी करपाचोय हावेस नाशिल्लो. फक्त लोकांक आदार जावचो, तांच्यो समस्या सुटाव्यो जावच्यो ही तळमळ तांची वागणूक आनी वावरांत पळोवंक मेळटाली. जायत्या जाणांक केतन हांचे विशीं ‘आमचो’ ही भावना आशिल्ली. हे भावनेच्या आदाराचेरच दोतोरान व्हड इश्टागत आनी घटमुट असो जनसंपर्क तयार केलो. अफाट असो इश्ट परिवार उबो केलो. मनशां जोडचीं, जाल्यार तीं केतन भाटीकारानूच! फुडल्या मनशाक पयले भेटेनूच आपलो करपाची तांची ही मित्रत्वाची भावना, व्यक्तिगत करिश्मा हाका लागून ते जात, पात, धर्म, लिंग, कातीचो रंग, कौटुंबिक फाटभुंय अशे जायते अडथळे पार करून केन्ना हे गजाली वा मुद्द्यांचे फुडें गेल्ले.
कर्मयोगी स्वयंसेवक
खूब व्हड जनसंपर्क आनी आपल्या एका उल्याचेर गर्दी जमोवंक शकपी एका परस एक अशे महारथी राजकी नेते गोंयांत आयज आसात, ते कित्याक, फोंडे वाठारांत अशे जायते व्हड नेते आसात, हातूंत मात्तय दुबाव ना. पूण, केतन भाटीकार की बातही कुछ और थी! राजकी क्षेत्रांत वावुरतना तांकां वेंचणुकेंतली विजयश्री आनी निर्विवाद येस हांणी जायते फावटी हुलकावणी दिली खरी, पूण ते केन्नाच खचले नात. ते निरशेले, अशें केन्नाच पळोवंक मेळ्ळें ना. एका कर्मयोगी स्वयंसेवका भशेन तांणी समाजकार्य केलें. आमकां कलाकार, कवी, लेखक हांकां समकालीन मनशांची तुळा इतिहासिक पात्रां कडेन करपाची एक सुप्त इत्सा सदाच आसता. भाटीकार हांची तुलना म्हाका महाभारतांतलो अंगराज कर्ण वा धर्मवीर संभाजी महाराज हांचे कडेन करपाचो मोह जाता. सगले गुण आंगांत आसूनय, व्हड कामगिरी करूनय, मनाचो, विचारांचो दिलदारपणा आसूनय नियतीन कितेंतरी दुर्दैवान झोमून घेवचें, हेच गजालीचें म्हाका रावून रावून अजाप दिसतालें आनी दुख्ख जातालें. काय दिसां पयली फोंडे पोट वेंचणुकेंत भाटीकार दंड थोपटून पुराय तयारी करून देविल्ले आनी ते जिखपाची ‘कालत्रयी शक्य नाशिल्ली’ अशी शक्यताय निर्माण जाल्ली आसतना सन्माननीय न्यायालयाचे आदेशान वेंचणूकच रद्द जावप हो एक विचित्र असो योगायोग आनी नियतीचो खेळ आसुंक शकता. ‘केतन भाटीकारांचा विजय असो’ अशो घोशणा दिवपी तांचे समर्थक आनी कार्यकर्त्यांचे तोंडार दिसपी निरशेवणी दुसरे दिसा आमी सगल्यांनी स्पश्ट पळयली.
भाटीकार दोतोर आपल्या उमेदीच्या काळांत समाजकार्य आनी राजकारणांत ठसो उमटोवपाक उमेदीन वावर करून सक्रिय आसतना मध्यान राती प्रवास करतना अचानक अपघातांत जाल्लो सर्पाचो दंश आनी दोतोराचें आकस्मिक मरण. हो अपघाती मृत्यू सगल्यांक व्हड धपको दिवपी थारलो. सगलेंच कशें अचकीत, अकल्पनीय, आकस्मिक आनी धक्कादायक तशेंच गूढ. होवूय एक नियतीचोच खेळ आशिल्लो काय? कोविड म्हामारीच्या काळांत हाता कडेन कार्यकर्ते आसात काय नात, हाची पर्वा करीनासतना कडक वत, भूक, तान, खंयच्याय वेळार जावपी जेवण, पुराय न जावपी न्हिद, शरीर आनी मनाचेर येवपी ताण हांचे कडेन आडनदर करून सर्वसामान्य कार्यकर्त्या प्रमाण लांब बाह्यांचो सादो शर्ट आनी पँट घालून लोकांच्या दारात वचून अन्नपदार्थ, जेवणांचे डबे, वखदां – गुळयो आनी जिणेंगरजेच्यो वस्तू आपल्या गाडयांचो उपेग करून, रातच्या 11.30 वा 12.30 आनी जायते फावटी रातच्या 1.30 घरा कडेन पावूनय बी पत्रकारां कडेन उलोवन कोविड परिस्थितीचो नियाळ मांडपी, न्हिद न जाल्ले कारणान तारवटलेले तांबडे दोळे घेवन पत्रकारांक सामकार वचपी दोतोर कोण विसरूंक शकता काय? फोंडेकार केन्नाच विसरचे नात. ते खंयच्या पक्षांत आशिल्ले आनी मागीर खंयच्या पक्षांत गेल्ले हाचे कडेन म्हाका काय सोयरसुतक ना, कारण हो लेख तांचें समाजकार्य नदरे मुखार दवरून बरयला, राजकी कारकीर्द न्हय.
केतन भाटीकार हो मनीस एक कर्मयोगी, जाचें काळीज एका स्वयंसेवकाचें आशिल्लें, जे सर्वसामान्य लोकांक लागून रात दीस वावर करूंक पळयताले. भाटीकार हांच्या स्वरूपांत फोंडेकार खूब किदेंतरी वगडावन बसल्यात. हें लुकसाण भरून येवचें ना.
सनतकुमार फडते
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
