भांगरभूंय | प्रतिनिधी
मनीस जल्माक येत सावन दर दिसा, दरेका वर्सान ताचें वय वाडटा. वय कोणाकूच रावना. केन्नाकेन्नाय वर्सां इतल्या वेगान फुडें वता, तीं खंय आनी केन्ना गेलीं हाचो पत्तोच लागना. देखून वर्सां आमकां कळनासतना फुडें वचत रावतलीं, आमकां रावची ना हें सत आमी स्विकारपाक जाय.
एक अमूक वय जातकच कुडीची वाड बंद जाता. पूण बौद्धीक, मानसीक, अध्यात्मीक वाडीक मर्यादा आसना. वाडट्या वया बराबर आमींय बी वाडपाक जाय. जें बरें तें वाडपाक जाय आनी जें वायट तें कमी जावन निमाणें ना जावपाक जाय. अशेंच जावंक जाय. मनीस जर तसोच उरलो जाल्यार एका वर्सान व्हडलो जावन फायदो तो कसलो?
‘‘Age is just a number ’’ अशेंय म्हणटात. वय हें फकत एक आंकडो. खरें. खंयचेंय बरें काम करपाक वा नवें कितें तरी शिकपाक वयाचें बंधन आसना. ह्या अर्थान वय खऱ्यांनीच एक आंकडो. पूण दर वर्सा मनशाचें वय वाडटा हें खरें. पूण वाडट्या वया बराबर मनशाची वाड जाता?
वय आमकां आमच्या वास्तवतायेचें माप दाखयता. मनीस चडांत चड 100 वर्सां जगूंक शकता. जगताच असोच ना. कोण कितलीं वर्सां जगतलो हें कोणाकूच खबर आसना. पूण वाडट्या वयाची जाणविकाय जावप गरजेची. ती जातकच जिवीत बरे तरेन जगूं येता.
वय वाडटा तशें वर्सां हातांतल्यान गलीं अशें दिसून मन खंती जालें जाल्यार जें करपाक जाय आशिल्लें तें केलेंना. देखून दर वर्सा जिविताचो नियाळ घेवप गरजेचें. वाडट्या वया बराबर जिविताचें गणित सारकें बसपाक जाय. समाधान आनी तृप्तताय वाडपाकूच जाय. नाजाल्यार खंय तरी गणित चुकलां अशें समजुचें.
आपूण केन्नाय तरी जाण्टो जातलो हें मतींत दवरून जिविताची आंखणी करपाक जाय. वयाच्या दरेका टप्प्याची सुंदरकाय वेगळी आसता. जाण्टेंपण हें एक प्रिविलेज. जाण्टें जावपाचें भाग्य सगळ्यांकच मेळना. वाडट्या वयाचे खूब फायदे आसात. मनीन अणभवान समृद्ध जाता. अर्थीक नदरेन थीर जाता. ताचे भितर समजिकाय आयिल्ली आसता. मनीस सगळ्या आंगांनी समृद्ध जाल्लो आसता. जावंक जाय. जर
मनशाक फाटल्यान वचन दिसता, परत भुरगो वा तरणो जायन दिसता जाल्यार ताच्या जिविताचें वेवस्थापन चुकलां अशें समुजचें.
संपदा कुंकळकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
