ब्ल्यू इकॉनॉमी, शाश्वत उदरगतींत गोंय देशांत आदर्शः उपराष्ट्रपती

भांगरभूंय | प्रतिनिधी

40वो गोंय घटक राज्य दीस मनयलो

पणजीः ब्ल्यू इकॉनॉमी आनी शाश्वत दर्यादेग उदरगतींत गोंय आघाडेर आसा फुडाराकूय अशेंच उरतलें. ह्या दोनूय मळार गोंय देशांतल्या हेर राज्यां खातीर आदर्श राज्य आसा अशें प्रतिपादन उपराष्ट्रपती सी पी राधाकृष्णन हांणी केलें. 40वें गोंय घटक राज्य दिसा निमतान आयोजीत केल्ले कार्यावळींत ते उलयताले. ह्या वेळार मुख्यमंत्री डॉ. प्रमोद सावंत, राज्यपाल अशोक गजपती राजू, केंद्रीय मंत्री श्रीपाद नायक, उदका स्त्रोत मंत्री सुभाष शिरोडकार, खासदार सदानंद शेट तानावडे, भाजपा प्रदेशाध्यक्ष दामू नायक आनी हेर मंत्री हाजीर आशिल्ले.
उपराष्ट्रपती राधाकृष्णन हांणी सांगलें, फुडाराक पर्यावरण समतोल दवरपी अर्थवेवस्था म्हत्वाची थारतली. ब्ल्यू इकॉनॉमी व्हड बदल घडोवन हाडूंक शकता. उदरगत टिकावू आनी समावेशक आसूंक जाय. समाजांतल्या दरेका घटकाचो आस्पाव जाल्यारूच ताका उदरगत म्हणूं येता. गोंयांतलें पर्यावरण, राखीव रानां, दर्यादेग, दायज सांबाळप ही फकत थळावी न्हय तर राश्ट्रीय जापसालदारकी आसा. गोंय एक सोबीत सुवात म्हूण संवसारभर वळखतात. हाचे भायर गोंयचे लोक आनी सैम हांचे मदल्या एकचारा खातीरय गोंयची वळख आसा.

फुडले पिळग्यां खातीर समतोल दवरप गरजेचें आसा. स्वताची अस्मिताय तिगोवन दवरून उदरगत करूं येता हें गोंयान दाखोवन दिलां. गोंयान आपलीं सांस्कृतीक मुळां तिगोवन दवरून आधुनिकता आपणायल्या. फाटल्या कांय वर्सांत गोंयान मुळावी बांदावळ, शिक्षण, भलायकी, डिजिटल प्रशासन मळार उल्लेखनीय कामगिरी केल्या. हांगाची पारदर्शक नोकर भरती प्रक्रिया तोखणायेची आसा. गोंयच्या तरणाट्यांनी आपलो दायज तिगोवन दवरचो. गोंयची संस्कृतीक विविधताय आनी अर्थीक उदरगत तिगोवन दवरपा खातीर सगळ्यांनी एकठांय येवन काम करपाक जाय. विकसीत भारताचें सपन पुराय करपा खातीर गोंय सयत हेर राज्यांनी उदरगत करची अशेंय उपराष्ट्रपती राधाकृष्णन हांणी सांगलें.
हाचे आदीं मुख्यमंत्र्यान सांगलें, गोंयची वेगळी वळख, अस्मिताय आनी संस्कृताय तिगोवन दवरपी सगळ्यांचे उपकार मानता. फाटल्या बारा वर्सांत गोंयांत जायतीं उदरगतीचीं कामां जाल्यांत. भाजपाच्या डबल इंजिन सरकाराक लागून हें शक्य जालें. नाजाल्यार गोंया सारकिल्ल्या ल्हान राज्यांत इतले उणे वेळात इतली उदरगतीची कामा जावप शक्य नाशिल्लें. गोंयचो एकचार तिगोवन दवरपा खातीर आमी ह्यान फुडें वावुरतले.

पर्यावरण जपप गरजेचें- राज्यपाल

गोंयाक देशांतले एक आदर्श राज्य जावपाची संद आसा. उदरगत समतोल आसप गरजेचें. फुडल्या पिळग्यां खातीर गोंयच्यो न्हंयो, दोंगर, दर्यादेग, गांव सांबाळून दवरपाक जाय अशें राज्यपाल अशोक गजपती राजू हांणी सांगलें.

मानेस्तांचो भोवमान

हाचे आदीं जाल्ले कार्यावळींत गोंयचे उदरगतींत योगदान दिवपी इकरा वेवसायीक, उद्देग आनी ब्रँड धनयांचो भोवमान केलो. तशेंच 120 पुलीस उपनिरिक्षकांक नेमणूक पत्रां दिली. ह्या वेळार डीडीएसएसवाय येवजणे खाला अतिरिक्त निधी दिवपाची घोशणा मुख्यमंत्र्यान केली.