भांगरभूंय | प्रतिनिधी
सगळ्यांत चड मागणी दक्षीण गोंयांत
भांगरभूंय । प्रतिनिधी
पणजीः 1 ते 28 मे 2026 ह्या काळांत गोंयांत डिजलाच्या वापरांत व्हड वाड नोंद जाल्या. राज्यांत हाय-स्पीड डिजलाची वट्ट विक्री 24,585 किल लिटराचेर पावल्या, जी फाटल्या वर्सा ह्याच काळांत 21,169 किल लिटर इतली आशिल्ली. फाटल्या वर्साचे तुळेंत अंदूं 16.14 टक्क्यांची वाड जाल्या. ही आंकडेवारी तेल विपणन कंपन्यांनी जारी केल्या.
हे आंकडेवारी प्रमाण, दक्षीण गोंयांत डिजलाच्या वापरांत सगळ्यांत चड 19.36 टक्क्यांची वाड नोंद जावन खप 9,255 किल लीटरा चेर पावलो, जी फाटल्या वर्सा 7,754 किल लिटर आशिल्लो. उत्तर गोंयांत फाटल्या वर्साच्या 13,415 किल लिटर खपाच्या तुळेंत अंदूं 15,330 किल लिटर खप नोंद जाला. ही आंकडेवारी 14.27 टक्क्यांची वाड दाखयता.
निमण्या कांय सप्तकां मदीं इंधनाच्या मागणींत व्हड प्रमाणांत वाड जाल्ली आसली तरी, सरकारी मालकीच्या तेल विपणन कंपन्यांनी गोंय तशेंच पुराय देशांत पेत्रोल, डिजल आनी एलपीजीची अखंडीत पुरवण करपाचें गिरायकांक आश्वासन दिलां, अशें गोंयांतल्या तेल कंपन्यांचे राज्यस्तरीय समन्वयक मधुरेंद्र के. पांडे हांणी सांगलें
गांवगिऱ्या वाठारांनी शेतकामाच्या हंगामाक लागून, जशें की लुवपाच्या कामां खातीर ही मागणी वाडल्या. सरकारी पंपांचेर मेळपी फायदेशीर दरांक लागून गिरायक हेर खाजगी पुरवण करपी पंपाचेर वच्चे परस सरकारी पंपां वटेन वतात. ते भायर, संस्थात्मक आनी वेपारी गिरायकय आतां किरकोळ इंधन पंपां कडल्यान इंधन विकते घेवपाक लागिल्ल्यान ही अतिरिक्त मागणी वाडल्या, अशी म्हायती पांडे हांणी दिली.
इंडियन ऑयल, बीपीसीएल आनी एचपीसीएल आपल्या टर्मिनल्स, डेपो, पायपलायन, एलपीजी बॉटलींग प्लांट आनी रिटेल आवटलेट्सच्या व्हड जाळ्या वरवीं इंधनाची पुरवण सुरळीत दवरतात. इंधनाची वेळार पुरवण जावची आनी पेट्रोलियम उत्पादनांची येरादारी खंयच न चुकता चालू उरची, हाका लागून पुरवण पंगड, येरादारी यंत्रणा आनी टर्मिनल ऑपरेशन्स 24 वरां काम करीत आसात, अशें पांडे हांणी सांगलें.
पुराय देशांत पेत्रोल, डिजल आनी एलपीजीचो फावो तितलो सांठो उपलब्ध आसा आनी पुरवण सुरळीत दवरपा खातीर सगळीं गरजेचीं पावलां उबारल्यात. कसलीच भिरांत दवर नासतना सदचे भशेन इंधनाची खरेदी करची आनी गर्दी वा कोफुसांव करचे न्हय. इंधनाच्या उपलब्धते विशीं खऱ्या म्हायती खातीर गिरयकांनी फकत तेल कंपनी आनी अधिकृत यंत्रणांनी जारी केल्ल्या सरकारी निवेदनांचेरुच विस्वास दवरचो, असो उलो पांडे हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
