भांगरभूंय | प्रतिनिधी
न्यूयॉर्क, खबरां संस्थाः जायत्या पालकांक चिडचिड करपी भुरग्यांक वा ल्हान भुरग्यांक फोन वा टॅबलेट दिवप हें तांकां शांत करपाचो सोपो मार्ग अशें दिसता. आनी खुबशे पालक अशें करतात आनी आपल्या कामात व्यस्त जातात. पूण हाचो वायट परिणाम भुरग्यांच्या आत्मसंयमाचेर (Self Control) जावंक शकता अशें अमेरिकेंतल्या यूसी इरविन विद्यापीठाच्या अभ्यासांत दिसून आयलां.
इरविन सयत स विद्यापिठांतल्या विद्वानांच्या एका पंगडान 210 कुटुंबांतल्या भुरग्यांचो 9 म्हयन्यां पसून ते 30 म्हयन्यां मेरेन अभ्यास केलो. संशोधन फुडारी स्टेफनी एम. रीच हांच्या मतान ‘भुरग्यां मदीं मोबायल फोन आनी टॅबलेटीचो चड वापर फुडाराक तांचे मदीं वागणूक संबंदी समस्या निर्माण करुंक शकतात.
जेन्ना भुरगीं अस्वस्थ जातात तेन्ना तांकां शांत करचे परस, तांचे कडेन उलोवचे आनी तांचे कडेन संवाद सादचे परस तांकां मोबायल फोन दितात आनी स्क्रीन मदीं गुंतायतात. संशोधक हाका ‘विस्थापन’ (डिस्प्लेसमेंट) अशें म्हणटात. हाका लागून व्हड समस्या निर्माण जावंक शकतात.
भुरग्यां मदीं वाडिल्ल्या स्क्रीन वेळाचे दुश्परिणाम
भावनीक समस्या, लक्ष केंद्रीत करपाक आडखळ, अभ्यासांत अपेस, न्हिदें वेळार त्रास जावप, स्थूलताय वाडप, दोळ्यांचेर ताण येवप.
रील्स, फास्ट-फॉरवर्ड हें व्यसन भुरग्यांचो पासियेंस काडून घेता
मोबायल, रील्स आनी ल्हान व्हिडियो पळोवपी भुरग्यां मदीं लक्ष केंद्रीत करपाचो उणाव, चिडचिडेपण, संवाद टाळप आनी अभ्यासाची आवड उणी जावप सारकिल्यो समस्या वाडत आसात. लांब व्हिडियो फास्ट फॉरवर्ड करून पळोवपाची संवय तांच्या वागणुकेचो एक भाग जावपाक लागला. हाका लागून कोणाचेंय भाशण वा उलोवप पुराय आयकून घेवचें पडटा तेन्ना तांकां बेगीन बोजार येवपाक लागता.
स्क्रीन वेळ वेवस्थापन करपा विशीं पालकांक सल्ले
० भुरग्यांचो स्क्रीन वेळ तांच्या पिराये प्रमाण आनी गरजे प्रमाण थारावचो.
० तुमचो स्वताचो स्क्रीन वेळ मर्यादीत करून एक सकारात्मक देख दिवप.
० भुरग्यां वांगडा बसून उलयात, आनी ऑफलायन वेळ घालोवपाचेर लक्ष केंद्रीत करात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
