पुरो जाले अपघात

भांगरभूंय | प्रतिनिधी

रेण्ट ए कार, बायकाक वेग नियंत्रण करपी यंत्र, जीपीएस बसोवंक जाय.

सहल वा ट्रिप म्हणल्यार मसाल्याचे शिवराक वा मांसाहारी जिनस खावप, बियर, सोरो, इल्ले ड्रग्स चाखप आनी खूब मस्ती करप न्हय. इश्टां वांगडा दर्यावेळ, दोंगराचेर वचप, गजाली मारप, थळावीं खाणां खावप, फोटो काडप… हातूंतय मजा येता. शांत जाग्यार दर्याची गाज वा वाऱ्याचो नाद आयकत बसप, मोबायल फोन खुटयाळ्याक लावन पैस खंयतरी सैमा सांगातान तल्लीन जावप वा रातच्या वेळार मंद संगीत आयकत बसप, घरांत एकोडो बसून बरेशें पुस्तक वाचप, सिनेमा पळोवप हातूंतय खोस मेळटा. ती घेवपाक मात कळपाक जाय. दरेकल्याची कालेत वेगळी. पूण कांय तरणाट्यांचे पंगड खंयूय वचून धुमशणां कांडटात, ती तांची पेजाद पिकनिकेची व्याख्या. हेरांकत्रास, मनस्ताप दिवप हिवूय सहलूच, अशें समजूपी अपूरबुद्द आसात. गोंयांत येवपी कांय पर्यटक हाचे पाश्ट आसतात. गोंयांत पांय दवरतकच सोरो पियेवन नाचपाकूच जाय, असो जायत्या जाणांचो समज. मात आपले मजेची दुसऱ्याक सजा मेळटा, हाचें भान तांकां उरना.
गोंयांत पर्यटकां कडल्यान जावपी अपघात वाडल्यात. शिवोले रॅण्ट ए कॅबान (थार जीप) दोगांक मोखले. एकलो आक्ताक गेलो. ही गाडी थार जिपीच्या धनयाचो ड्रायव्हर चलयतालो खंय. पुण्याच्या एका ड्रायव्हरान शिर्ली रस्त्यार कुशीकच्यान स्कूटरी वयल्यान वचपी एके बायलेक धपको दिलो. रॅण्ट ए कॅबान हाचे पयलींय व्हडले अपघात केल्यात. एकलो तर पुला वयल्यान सकयल पडिल्लो. कालच्या शिवोलेच्या अपघाता उपरांत लोक तिडकल्यात. हो अपघात न्हय, तर भायल्यांनी हांगा येवन गोंयकारांचो केल्लो खून, अश्योय प्रतिक्रिया आयल्यात. रॅण्ट ए कॅब हो प्रकारूच बंद करपाचीय मागणी जाता. अपघाता कडेन ‘स्टेट डिझास्टर’ म्हूण पळोवचें असोय एक विचार आयला. दरवर्सा गोंयांत 250 ते 350 लोक अपघातांत मरतात. (हाचे तीन पटीन जखमी जातात. कांय गंभीर) अपघात आतां फक्त येरादारी पुरतोच उरूंक ना, तर भौशीक भलायकेचो गंभीर प्रस्न जाला. 70 टक्के अपघात भाड्याच्यो गाडयो घेवन भोंवपी पर्यटकांनी नेम मोडिल्ल्यान जातात, अशें खुद्द मुख्यमंत्र्यान हालींच सांगिल्लें. सरकारी आंकडेवारी प्रमाण, 2020 ते जून 2025 मेरेन रॅण्ट ए कार गाडयांचे 43 तर स्कूटरींचे 18 अपघात जाल्यात.
पर्यटक गाडयो कित्याक भाड्यान घेतात? हांगाची भौशीक येरादारी भरंवशाची ना. रातचीं 8- 9 जालीं काय बसी बंद जातात. टॅक्सीचें भाडें म्हारग अशी पर्यटकांची कागाळ. इश्टीणी वांगडा स्कूटर वा गाडी घेवन हेडप म्हणजे फ्रिडम, थ्रील असो जायत्या जाणांचो समज आसा. ताका लागून गाडयो भाड्यान घेवप वाडलां. एकेका कॅब वेवसायीका कडेन 25- 25 गाडयो आसात खंय. पर्यटक गाडी घेतात, भरपूय पियेतात, ड्रग्स घेतात, वेगान गाडी चलयतात, मोबायल पळयत ड्रायव्हींग करतात, हेल्मेट नासता, जागरणाक लागून लकणी येता, सुशेग मेळूंक नाशिल्ल्यान कूड सुस्तेल्ली आसता. तातूंत अशीर, अनवळखी रस्ते. मागीर अपघात जावचे नात जाल्यार कितें जातलें? एकल्यान तर चान्न्याचे रातीं रस्तो समजून गाडी न्हंयेंत घाल्ली.
रस्ते रुंद करपाची गरज आसा. गांवांतल्यान गेल्यात ते रस्ते अशीर आसात. खंय ते सांगपाची गरज ना. सगल्याकूच. ड्रायव्हर नशेंत आसल्यार ताका खर बंदखण जावंक जाय. प्रत्येक पुलीस स्टेशनाचेर उणेच दोन तरी अल्कोमिटर जायच. रेण्ट ए कार, बायकाक वेग नियंत्रण करपी यंत्र, जीपीएस बसोवंक जाय. हेर गाडयांच्या ड्रायव्हरांचेरुय लक्ष जाय. रातच्या वेळार बसी सुरू आसल्यार खाजगी गाडयांचें प्रमाण उणें जातलें. आतां उदक नाका वयर पावलां. हे अपघातरुपी खून, खुनाचे यत्न बंद जावचे, हे खातीर कितें तरी बेगीन करात!!