भांगरभूंय | प्रतिनिधी
फोंडें: गोंयांत ह्यान पयलीं व्हडा प्रमाणाचेर हेर राज्यांतल्यान भाजी-पालो आयात करचो पडटालो. मात फाटल्या कांय वर्सांनी सरकाराच्या येवजण्यांचो लाव घेवन शेतकारांनी सध्या भाजीपालो निर्यात करपाक सुरवात केल्या. हाचे वेल्यान डबल इंजिन सरकाराचे कार्यकिर्दींत गोंयान स्वावलंबी जावपाच्या मार्गान पावल मारलां, अशें मुख्यमंत्री प्रमोद सावंत हांणी सांगलें.
वेरें- वाघूर्मे पंचायत वाठाराांतल्या सावयवेर्यां उबारिल्ल्या नव्या खेळां संकुलनाचे उक्तावण कार्यावळी मुख्यमंत्री उलयताले. ह्या वेळार थळावे आमदार गोविंद गावडे, जिल्लो पंचायत वांगडी प्रितेश गांवकार, सरपंच शोभा पेरणी, गट विकास अधिकारी अश्विन देसाय, वेलिंग – प्रियोळचे सरपंच हर्षा गावडे, वळवयचे सरपंच विनायक वेंघूर्लेकार आनी हेर मानेस्त हाजीर आशिल्ले.
सावयवेर्या सारकिल्ल्या गांवगिर्या वाठारांत सुमार दोन कोटी रुपया खर्च करून व्हड खेळां संकूल उबारलें. हाचो लाव खेळगड्यांक मेळटलो. आंतरराष्ट्रीय तशेंच राष्ट्रीय पांवड्यार विवीध सर्तीय गांवगिर्या वाठारांत आयोजीत करपाक गोंय सरकार प्राधान्य दितलें. सरकार गांवगिर्या वाठारांत विवीध सुविधाची पुरवण येसस्वी पणानकरतलें. ह्या सुविधांचो लाव घेतना दरेकल्यान जापसालदारी घेवप गरजेचें अशें मुख्यमंत्र्यान मुखार म्हणलें.
आमदार गोविंद गावडे हांणी, गांवगिर्या भागात अत्याधुनीक सुविधा उपलब्ध करून दिवपाक गोंय सरकाराक येस आयलां. मात अत्याधुनीक सुविधांचो उपेग करतना दरेकल्यान जापसालदारकेन काम करपाक जाय. खेळां संकुलाचें काम कांय वर्सां आडकून उरिल्लें. मात लोकांच्या गरजे प्रमाण प्रकल्पाचें काम पुराय करून लोकार्पण केलें. हाचो लाव सगल्यांत जातलो अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
