भांगरभूंय | प्रतिनिधी
केंद्र आनी राज्य सरकाराच्यो येवजण्यो सगल्याक पावोवपाचेर भर
पणजी : सरकारी, खाजगी आनी कोमुनिदादचे जमनींतलीं घरां नांवाचेर करपी ‘म्हजें घर येवजणे’ खाला आनीक ३ हजार अर्ज निकालांत काडल्यात. उत्तर आनी दक्षीण गोंयांत खाशेली कार्यावळ आयोजीत करून ३ हजार घरांच्या सनदींचें वाटप करतले, अशी म्हायती मुख्यमंत्री डॉ. प्रमोद सावंत हांणी दिली. केंद्र आनी राज्य सरकाराच्यो येवजण्यो कोणशा कोणशांनी पावोवपा वांगडा एनडीए सरकाराक १२ वर्सां पुराय जाल्ले खातीर दरेका मतदारसंघांत कार्यावळी आयोजीत करतले.
भाजप, मगो आनी सरकाराक फाटबळ दिवपी अपक्ष आमदारांची आयज पणजे बसका जाली. मुख्यमंत्री डॉ. प्रमोद सावंत, प्रदेश भाजप अध्यक्ष दामू नायक, केंद्रीय मंत्री श्रीपाद नायक ह्या वेळार हाजीर आशिल्ले. बसके उपरांत मुख्यमंत्री डॉ. प्रमोद सावंत हांणी बसकेंतल्या निर्णयांची म्हायती दिली.
सरकारी, कोमुनिदाद तशेंच खाजगी जमनींतलीं घरां नांवाचेर करपाचे आनीक ३ हजार अर्ज मंजूर केल्यात. १० आनी ११ जुनाक उत्तर आनी दक्षीण गोंयांत जावपी खास कार्यावळींत घरांच्यो सनदी वाट्टले.
हरीत कॉरीडॉर उपक्रमा खाला राष्ट्रीय आनी राज्य महामार्गा खाला १० लाख झाडांचे रोपे लायतले. ५ जून ते ५ सप्टेंबर मेेरेन हो उपक्रम जातलो. केंद्रांतल्या एनडीए सरकाराक १२ वर्सां पुराय जाल्यांत. ह्या निमतान प्रधानमंत्री नरेंद्र मोदी हांकां बसकेंत परबीं भेटयलीं. ह्या निमतान दरेका मतदारसंघांत विवीध कार्यावळींचें आयोजन कतले. प्रधानमंत्री नरेंद्र मोदी सप्टेंबर वा ऑक्टोबरांत गोंयां भेट दितले. ह्या वेळार विवीध प्रकल्पांचें उक्तावण करतले. सुरू आशिल्ले प्रकल्प प्राधान्यान पुराय करतले. बसकेंत प्रकल्पांच्या कामांचो नियाळ घेतलो. प्रधानमंत्री रोजगार येवजणे खाला आतां मेरेन १५०० तरणाट्यांक प्रशिक्षण दिलां. आनी १५ हजार तरणाट्यांक प्रशिक्षण दितले. तशेंच चेक्ड बाय दोतोर, हेल्थ विथ आयुर्वेदा ह्या उपक्रमा खाला परत फुकट तपासणी करतले, अशी म्हायती मुख्यमंत्र्यांनी दिली.
मंत्रिपदा विशीं चर्चा ना
रिते मंत्रिपद कोणाक मेळटलें? हाची चर्चा सुरू आसा. बसकेंत मंत्रिपदाविशीं चर्चा जावंक ना, अशें मुख्यमंत्री डॉ. प्रमोद सावंत हांणी सांगलें. आमदार दिलायला लोबो हांणीय बसकेंत मंत्रिपदाची चर्चा जावंक नाशिल्ल्याचें सांगलें.
मजगतीं, ही बसका सत्ताधारी मंत्री, आमदार हांची आशिल्ली. तरी भलायकी मंत्री विश्वजित राणे, महसूल मंत्री बाबूश मोन्सेरात, पंचायत मंत्री मॉविन गुदिन्हो, भौशीक बांदकाम खात्याचे मंत्री दिगंबर कामत, आमदार निलेश काब्राल बसकेक हाजीर नाशिल्ले. मगोचे मंत्री सुदिन ढवळीकार, आमदार जीत आरोलकार तशेंच अपक्ष आमदार अलेक्स रेजिनाल्ड, डॉ. चंद्रकांत शेट्ये, आंतोन वाज हे हाजीर रावले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
