भांगरभूंय | प्रतिनिधी
नवी दिल्ली: ‘‘ही नोट दुसरी दियात. ही पिंजल्या.’’ हीं उतरां आतां इतिहासांतूच उरतलीं. कारण, भारतीय रिझर्व्ह बँक परत बाजारांत ‘पॉलिमर’ म्हळ्यार प्लास्टिकाच्यो नोटी हाडपाचे तयारेंत आसा. देशांतल्या गांवगिर्या वाठारांनी आजूनय व्हडा प्रमाणांत कागदी चलनाचो वापर जाता. कागदाच्यो नोटी रोखड्योच पिड्ड्यार जाल्ल्यान ताचो विलो लावपाचो खर्चूय चड आसता. हे फाटभुंयेर आरबीआयन आतां प्लास्टीक नोटी चलनांत हाडपाची तयारी सुरू केल्या. पाटणा आनी मुंबय हांगा जाल्ल्या आरबीआय संचालक मंडळाच्या फाटल्या दोन बसकांनी ह्या विशयाचेर सविस्तर चर्चा जाल्या.
प्लास्टीक नोटी कित्याक हाडटात?
कागदाच्या नोटीं परस प्लास्टीकच्या नोटांचें आयुश्य चड आसता. उदकांत भिजल्यार त्यो कागदाच्या नोटां वरीं सहज पिंजनांत वा तांकां कसलेंच लुकसाण जायना. सुरवातेक ह्यो नोटी छापपाचो खर्च चड दिसूं येता, मात तांचें लांब आयुश्य सरकाराक परत परत नोटी छापपा पसून व्हड प्रमाणांत वाटोवपाक शकता. आरबीआय सुत्रांनी दिल्ले म्हायती प्रमाण आतां देशांतलीं एटीएम मशिनां प्लास्टीक नोटी खातीर सक्षम करतले.
नोटी छापपा खातीर आरबीआयचो खर्च
रिझर्व्ह बँकेचें अर्थीक वर्स २०२४-२५च्या वर्सुकी अहवाला प्रमाण, कागदांचे नोटींचे छापणुकेचेर वट्ट ६,३७२.८ कोटी रुपया खर्च जाला. त्यान पयलींच्या वर्सा ५,१०१.४ कोटी रुपया खर्च आयिल्लो. प्लास्टीक नोटांच्या दिर्घ आयुश्याक लागून हो खर्च फुडल्या कांय वर्सांनी भरतलो असो अदमास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
