भांगरभूंय | प्रतिनिधी
म्हापशें: शिवोले रेंट अ कॅब थार जीपीन दुचाकीक धपको दिलो. ह्या अपघातांत एकल्याक मरण आयलें जाल्यार 14 वर्सां पिरायेचो भुरगो गंभीर जखमी जालो.
चड म्हायती प्रमाण, सकाळीं सुमार 6 वरांचेर शिवोलेच्या मार्ना हांगाच्या फर्नांडीसवाड्यार थारीन एके दुचाकीक नेटान धपको दिलो. हातूंत ३४ वर्सा पिरायेचो दुचाकी चलोवपी संकेत सूर्यकांत दाभोळकार रावपी दांडा, शिवोले हाका जाग्यारुच मरण आयलें, जाल्यार ताचे वांगडा आशिल्लो १४ वर्सा पिरायेचो हणजुणां रावपी निश्चल मोरजकार हो भुरगो गंभीर जखमी जालो. जखमी भुरग्याचेर सध्या जीएमसींत उपचार चलतात.
हणजुणां पुलिसांनी दिल्ले म्हायती प्रमाण, मूळ केरळाचो दुबावीत थार ड्रायव्हर व्हाय कृष्णन हो GA 03 Z 8100 नंबराची थार घेवन चोपड्या सावन दांडाच्या दिकेन वतालो. जाल्यार GA 03 J 1332 ही मोटारसायकल मुखारच्यान येताली. थारीन मुखारच्यान येवपी हे मोटारसायकलीक नेचान धपको दिलो. धपको इतलो नेटान आशिल्लो की स्कुटरीचें व्हड लुकसाण जालें आनी संकेताक जाग्यारुच मरण आयलें. जाल्यार निश्चल गंभीर जखमी जालो. हे घडणुकेची म्हायती मेळटकच पुलिसांनी घडणूक सुवातेर वचून पंचनामो केलो आनी दुबावीत थार ड्रायव्हराक ताब्यात घेतलो.
चिंतेची गजाल म्हळ्यार फाटल्या तीन दिसांत गोंयांत थार गाडयेचो हो दुसरो भिराकूळ अपघात. हाचे आदीं मडगांवच्या शिर्ली हांगा वेगान वचपी थारीन स्कुटरीवेल्यान वचपी बायलेक उडयल्ली. तातूंत ती गंभीर जखमी जाल्ली. सध्या तिचेर जीएमसींत उपचार चलतात. ह्या प्रकरणांत महाराष्ट्रांतल्या दुबाविताक गोंय पुलिसांनी अटक करून ताचेर खून करपाचो यत्न केल्ल्याचो गुन्यांव नोंद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
