भांगरभूंय | प्रतिनिधी
कुमारजुंवेंच्या आमदारान लक्ष घालून शेड उबारपाची मागणी
माशेल: आखाड्यार निवारो शेड सामकी घातक स्थितींत आसून ताचो वापर सद्या मसुंडेत सरणां खातीर लागपी लांकडा दवरपा खातीर करतात. सद्या पावस तेंकिल्लो आसून स्कूल बशी खातीर राविल्ल्या विद्यार्थ्यां खातीर आनी बसी खातीर राविल्ल्या ज्येश्ठ नागरीक आनी हेर प्रवाशां खातीर पर्यायी निवारो शेड उपलब्ध नाशिल्ल्यान अंदूं विद्यार्थ्यांक, नागरिकांक गरजे भायर मनस्ताप सोंसचो पडटलो. ताका लागून पावसाच्या दिसांनी पर्यायी सोय नाशिल्ल्यान ऐनवेळार उटंगाराचो पावस आयलो जाल्यार भिजिल्ले स्थितींत विद्यार्थ्यांक आनी नागरिकांक कामार वच्चें पडटलें. हाका लागून नागरिकां मदीं निरशेवणीचें वातावरण पातळ्ळां.
आखाड्यार बस थांब्यार कितल्याशा वर्सां पयलीं पंचायती वतीन निवारो शेड बांदिल्ली. ताका लागून वतांत आनी पावसांत विद्यार्थ्यांची आनी नागरिकांची बरी सोय जाल्ली.
पूण ती निवारो शेड चिखल मातयेंत बांदिल्ली आशिल्ल्यान कांय वर्सांतूच ही निवारो शेड न्हंयचे वटेन बागवल्ल्यान हे शेडीक सगली कडेन वेरो गेल्ल्यान ती निवारो शेड घातक जाल्या. ताका लागून हे शेडीत प्रवासी आनी विद्यार्थ्यांनी वचप बंद केलां.
पयलीं हांगा व्हड प्रमाणांत प्रवासी बस सेवा उपलब्ध आशिल्ली कोरोना महामारीच्या काळांत कितल्योश्योच खाजगी बसी बंद जाल्ल्यान हांगासरल्यान पणजी आनी वास्को हांगा दोन इलेक्ट्रीक बसी आनी एक खाजगी बस म्हजी बस येवजणे खाला कार्यरत आसा.
तशेंच सांतईस्त्यांव हांगासरल्या हायस्कुलाचे दोन बालरथ सकाळीं आनी दनपारां यो-वच करतात. प्रवासी बसी खातीर वेळा पयलींच बस स्टॅण्डार येतात. बशी खातीर ते आखाडाे पुला कुशीक वतात उक्तडार आनी पावसांत तीच परिस्थिती आशिल्ल्यान विद्यार्थी आनी ज्येश्ठ नागरीक तशेंच प्रवाशांक पावसाच्या दिसांनी पावसाक सामकार वच्चें पडून भिजचें पडटलें. ताका लागून पालक, विद्यार्थी, ज्येश्ठ नागरीक आनी प्रवाशां मदीं भिरांतीचें वातावरण पातळ्ळां.
घातक जाल्ल्या निवारो शेडींत सद्या निमण्या संस्कारा खातीर लागपी लांकूड सांठोवन दवरलां. ताका लागून ती निवारो शेड हेर कामां खातीर निरुपेगी जाल्या.
कुमारजुंवेंचे आमदार राजेश फळदेसाय हांणी हातूंत लक्ष घालून हांगा उपलब्ध आशिल्ले सुवातेर निवारो शेड उबारून हांगासरले विद्यार्थी, ज्येश्ठ नागरीक आनी प्रवाशांची गैरसोय पयस करची अशी आखाडकारांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
