भांगरभूंय | प्रतिनिधी
पणजी : गोंयांतले पर्यावरण चळवळींत मोलादीक योगदान दिल्ले फादर बोलमॅक्स परेरा हांकां आयज केपेंच्या होली क्रॉस इगर्जेंत निमाणो निरोप दिलो. केपेंच्या होली क्रॉस इगर्जेंत जाल्ले निमाणे प्रार्थने उपरांत तांची कूड केपें सिमेतरींत पुरली.
तांच्या निमाण्या संस्कारांत हजारांनी लोक हाजीर आशिल्ले. आमदार निलेश काब्राल, आमदार एल्टन डिकोस्ता, रेजिनाल्ड लॉरेन्स, विरेश बोरकर, आदले उपमुख्यमंत्री बाबू कवळेकार, आदले आमदार जयेश साळगांवकार, काँग्रेसीचे प्रदेश अध्यक्ष अमीत पाटकार आनी हेर मानेस्त आनी पर्यावरण चळवळीचे कार्यकर्ते हाजीर राविल्ले.
चिखली वास्कोचे सेंट फ्रांसिस झेवियर इगर्जेंत मुखेल पाद्री आशिल्ल्या फादर बोलमॅक्स पेरेरा हांकां काळजाचो खर आताक येवन मरण आयिल्लें. आयज तांचे कुडीचेर निमाणे संस्कार जाले. ताचे आदीं सकाळीं ताची कूड लोकांक पळोवपा खातीर चिखलीचे इगर्जेंत हाडली. त्या वेळार हे इगर्जेंत एक खाशेलें मिस घडोवन हाडलें. काँग्रेसीचे प्रभारी माणिकराव ठाकरे, आपची गोंयची प्रभारी आतिशी हांणी लेगीत तांकां आर्गां ओंपलीं.
ते उपरांत फा. बोलमॅक्स हांची कूड ताच्या मूळ गांव केप्यां हाडली. वाटेर पाड्डेंचे मेरी इमाक्युलेट इगर्जेच्या वाठारांत लोकांनी तांचे कुडीचें दर्शन घेतलें. उपरांत तांची कूड पिंपळ कट्टा केप्यां ताच्या घरा हाडली. ह्या वेळार गांवच्या लोकांनी निमाणो मान दिलो.
काळजाच्या आताकान मंगळारा फांतोडेर मरण आयिल्ल्या फादर बोलमॅक्साचे कुडीचो बुधवारा पोस्टमार्टेम जालो. पोस्टमार्टेमाच्या अहवालाचो अभ्यास करून अहवाल तयार करपा खातीर गोंय वैजकी म्हाविद्यालयान 4 दोतोरांचो पंगड स्थापन केला. हो अहवाल प्रयोगशाळांक धाडपा सयत पुलिसांक सादर जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
