भांगरभूंय | प्रतिनिधी
पणजी : गोंयांतल्या पर्यावरण चळवळींत मोलादीक योगदान दिल्ले फादर बोलमॅक्स परेरा हांकां आयज केपेंच्या होली क्रॉस इगर्जेंत दुकांनी निमणो निरोप दिलो. केपेच्या होली क्रॉस इगर्जेंत जाल्ले निमाणे प्रार्थने उपरांत तांची कूड केपे सिमीतरींत पुरली.
तांच्या निमाण्या संस्कारांत हजारांनी लोक हाजीर आशिल्ले. आमदार निलेश काब्राल, आमदार एल्टन डिकोस्ता, रेजिनाल्ड लॉरेन्स, विरेश बोरकर, आदले उपमुख्यमंत्री बाबू कवळेकार, आदले आमदार जयेश साळगांवकार, कॉंग्रेसीचे प्रदेश अध्यक्ष अमित पाटकर आनी हेर मानेस्त आनी पर्यावरण चळवळीचे कार्यकर्ते आशिल्ले.
चिखली वास्कोच्या सेंट फ्रांसिस झेवियर इगर्जेंत मुखेल पाद्री आशिल्ल्या फादर बोलमॅक्स पेरेरा हांकां काळजाचो खर आताक येवन मरण आयिल्लें. आयज तांचे कुडीचेर निमाणे संस्कार जाले. ताचे आदीं सकाळीं ताची कूड लोकांक पळोवपा खातीर चिखलीच्या इगर्जेंत हाडली. त्या वेळार हे इगर्जेंत एक खाशेलें मिस घडोवन हाडलें. कॉंग्रेसीचे प्रभारी माणिकराव ठाकरे, आपच्यो गोंयच्यो प्रभारी आतिशी हांणी लेगीत तांकां आर्गां ओपलीं.
ते उपरांत ताची कूड ताच्या मूळ गांव केपें हांगा हाडली. वाटेर पाड्डेच्या मेरी इमाक्युलेट इगर्जेच्या वाटारांत लोकांनी तांचे दर्शन घेतलें. उपरांत तांची कूड पिंपळ कट्टा केपें हांगच्या ताच्या घरा हाडली. ह्या वेळार गांवच्या लोकांनी निमाणो मान दिलो.
काळजाच्या आताकान मंगळारा फांतोडेर मरण आयिल्ल्या फादर बोलमॅक्साच्या कुडीचो बुधवारा पोस्टमार्टेम जालो. पोस्टमार्टेमाच्या अहवालाचो अभ्यास करून अहवाल तयार करपा खातीर गोंय वैजकी म्हाविद्यालयान ४ दोतोरांंचो पंंगड स्थापन केला. हो अहवाल प्रयोगशाळांंक धाडपा सयत पुलिसांंक सादर जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
