भांगरभूंय | प्रतिनिधी
आरजी समितीची आमदार विरेश हांचे सयत जातली बसका
पणजी : आरजी समिती वांगड्यां खाला वॉटसऍप चॅट वायरल जाल्ल्यान परतून खवदळ निर्माण जाल्या. आमदार विरेश बोरकार हांणी आरजीचे बसकेक हाजीर रावपाचे संकेत दिल्ले आसतनाच वॉटसऍप चॅट वायरल जाल्ल्यान परतून नवो वाद निर्माण जावपाची शक्यता आसा. ही पक्षाची भितरली गजाल आसा. चर्चा केल्या उपरांत हाचेविशीं स्पश्टीकरण दितले, अशें आरजीचे पदाधिकारी अजय खोलकार हांणी सांगलें.
आरजी अध्यक्षपद सोडपा सयत मनोज परब हांणी राजकारण सोडिल्ल्यान आरजीचो नवो अध्यक्ष कोण? अध्यक्षपदाची नेमणूक केन्ना जातली? अशे प्रस्न निर्माण जाल्यात. कांय जाण आरजीच्या फुडाराविशीं लेगीत दुबाव उक्तायतात.
इतले मजगतीं आरजी बसकेची तारीख निश्चीत करचे पयलीं एका दिसा पयलीं आपणाक कळोवचें, असो इमेल आमदार विरेश बोरकार हांणी समितीच्या वांगड्यांक धाडला. असो इमेल आयिल्ल्याची म्हायती पदाधिकारी अजय खोलकार हांणी दिली.
आमदार विरेश बोरकार हांची बाजू आमी आयकून घेतले. मडगांवाा जाल्ली बसका तशेच सांत आंद्रे गटान घेतिल्ले पत्रकार परिशदेविशीं आमदाराक जाप विचारतले. मनोज परब हांच्या राजिनाम्या उपरांत अध्यक्षपदाविशीं लेगीत चर्चा जातली. आमदार विरेश बोरकार हांकां कारणां दाखय नोटीस जारी केल्या. नोटीस जारी करून लेगीत तो बसकेक हाजीर रावूंक ना वा समितीच्या वांगड्यांक मेळपाक लेगीत येवंक ना, अशें अजय खोलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
