भांगरभूंय | प्रतिनिधी
केंद्रीय मजूर, रोजगार मंत्री मांडविया हांचे कडेन मुख्यमंत्र्यांची चर्चा
पणजी : मडगांवच्या इएसआय हॉस्पिटलांत बेगीनूच वैजकी म्हाविद्यालय सुरू जातलें. गोंय सरकाराची मागणी बेगीन पुराय करपाचें आस्वासन केंद्रीय मजूर, रोजगार आनी खेळां मंत्री मनसुख मांडविया हांणी दिलां. मुख्यमंत्री डॉ. प्रमोद सावंत हांणी दिल्लींत केंद्रीय मजूर, रोजगार आनी खेळां मंत्री मनसुख मांडविया हांची भेट घेवन विवीध विशयांचेर चर्चा जाली.
मंगळारा रातीं दिल्ली गेल्ले मुख्यमंत्री डॉ. प्रमोद सावंत हे विवीध केंद्रीय मंत्र्यांच्यो भेटी घेत आसा. बुधवारा प्रधानमंत्री नरेंद्र मोदी, गृहमंत्री अमीत शहा आनी बंदर, न्हंय येरादारी मंत्री सर्बानंद सोनोवाल हांची भेट घेतल्या उपरांत बिरेस्तारा तांणी केंद्रीय मजूर आनी रोजगार मंत्री मनसुख मांडविया हांची भेट घेतली. राज्यांत भलायकी सेवांचो विस्तार जायत आसा. दोतोरांचो उणाव पयस जावचो म्हूण आनी एका वैजकी म्हाविद्यालयाची गरज आसा. मडगांवां इएसआय हॉस्पिटलांत वैजकी म्हाविद्यालय सुरू करपाचो निर्णय राज्य सरकारान घेतला. केंद्रान मान्यताय दिले उपरान इएसआय हॉस्पिटलात वैजकी म्हाविद्यालय सुरू जातलें.
बुधवारा केंद्रीय गृहमंत्री अमित शहा हांचे कडेन मुख्यमंत्र्यांनी विधानसभेंत एसटी आरक्षणाच्या कार्यवायेविशीं चर्चा केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
