भांगरभूंय | प्रतिनिधी
जोयडा : बेळगांव-गोंय राष्ट्रीय महामार्गावेल्या रामनगर-अनमोड मार्गार गवेगाळी क्रॉस हांगा बिरेस्तारा सकाळीं सुमार देड वरांचेर भिरांकूळ अपघात जालो. गाडी आनी टेम्पो मदीं जाल्ल्या ह्या अपघातांत दोगांक मरण आयलें. जाल्यार हेर तीग जाण गंभीर जखमी जाले.
हे विशीं मेळिल्ले चड म्हायती प्रमाण, आंध्र प्रदेश पासिंगची एक गाडी गोंयच्यान कर्नाटकाचे दिकेन प्रवास करताली. तेन्नाच, केपेंचो एक वेवसायीक टॅम्पो कर्नाटकांतल्यान बॉयलर कोंबड्यो घेवन रामनगर-अनमोड मार्गान गोंयचे दिकेन येतालो. सुमार देड वरांचेर गवेगाळी क्रॉस वाठारांत गाडी चालकान फुडल्या वाहनाक ओव्हरटेक करपाचो यत्न केलो. मात, घाट रस्त्यावेल्या धोक्याच्या वोल्ताचेर चालकाचें नियंत्रण सुटिल्ल्यान हे गाडयेन मुखारच्यान येवपी टॅम्पोक वचून धपको दिलो. ह्या दोनूय वाहनां मदींच्या धपक्याचो आवाज बरोच फुडें मेरेन आयकुपाक आयलो.
ह्या अपघातांत गाडयेंतल्या दोगां प्रवाशांक गंभीर दुखापत जाल्ल्यान तांकां घडणुके सुवातेरूच मरण आयलें. मरण आयिल्ले दोगूय जाण आंध्र प्रदेशांतले आशिल्ल्याची म्हायती पुलिसांनी दिली. तशेंच कार चालक आनी टॅम्पोंतलीं दोग जाणां गंभीर जखमी जालीं. तांकां थळाव्यांचे मजतीन बेगोबेग लागसारच्या हॉस्पिटलांत उपचारा खातीर दाखल केल्यां. जखमीं मदल्या दोगांची भलायकी हुस्न्याची आशिल्ल्याचें वैजकी सुत्रां कडल्यान समजता.
अपघाताची म्हायती मेळटांच थळावे आनी महामार्गावेल्या हेर वाहनचालकांनी रोखडीच घडणुके सुवातेर धांव घेवन मदत करपाक सुरवात केली आनी वाहनांत आडकल्ल्या जखमींक भायर काडले. हे घडणुकेक लागून राष्ट्रीय महामार्गावेली येरादारी कांय काळा खातीर ठप्प जाल्ली. उपरांत रामनगर पुलीस स्टेशनाचे अधिकारी आनी कर्मचार्यांनी घडणुके सुवातेर पावून अपघात जाल्लीं वाहनां कुशीक केलीं आनी येरादारी सुरळीत केली. ह्या प्रकरणांत रामनगर पुलिसांनी गुन्यांव दाखल केला. फुडलो तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
