भांगरभूंय | प्रतिनिधी
दिसनाशिल्ल्या मनशां खातीर चड प्रवेश सुलभ उपकरणांचें उत्पादन जावपाचे गरजेचेर व्हायट पेपरांत भर दिला. देखीक…..
मुंबयच्या सेंट झेवियर काॅलेजीच्या झेवियर रिसोर्स सेंटर फॉर द व्हिज्युअलली चॅलेंज्ड (एक्सआरसीव्हीसी) हांणी हालींच एक खूब म्हत्वाचो व्हायट पेपर (श्वेत पत्रिका) उजवाडा हाडला. ग्लोबल एक्सेसबिलिटी जागृताय दीस 2026 च्या निमतान तांणी ‘बिल्ट टू इंक्लूड: एक्सपॅंडिंग द रीच ऑफ कंज्युमर प्रोडक्ट्स थ्रू एक्सेसबिलिटी’ ही श्वेतपत्रिका उजवाडायल्या.
ह्या पेपरांत मुखेल प्रवाहांतल्या गिरायक उत्पादनांत सुलभतायेची गरज आनी गिरायक वस्तू निर्माते आपल्या उत्पादनांत सुलभताय हाडूंक शकतात ह्या गजालीचेर आश्वासक भर दिला. गिरायक वस्तू निर्मात्यांक तांच्या उत्पादनांची सुलभताय सुनिश्चीत करपाक आनी व्यापक बाजारपेठेंत पावपाक, गिरायकांचो विस्वास आनी निश्ठा आनी तांच्या वेवसाया खातीर ‘ब्रँड इक्विटी’ तयार करपाक वेवसायीक संद वाडोवपाक हो उलो.
दिसनाशिल्ल्या मनशां खातीर चड प्रवेश सुलभ उपकरणांचें उत्पादन जावपाचे गरजेचेर व्हायट पेपरांत भर दिला.
देखीक, सत्तर वर्सां पिरायेचो मनीस घाळपणान वॉशिंग मशिनाक हात लायता आनी ताचेर आशिल्लो बाल लॉक सक्रिय करता. ताच्या कार्यांत व्यत्यय आयिल्ल्यान ती आबोलार जाता आनी ताका लागून ताका दम्याचो झटको येता.
दुसऱ्या प्रकरणांत दिश्टीबाधित मनीस चुकून टच स्क्रीन वॉशिंग मशीनाचेर प्रोग्राम बदलता. जेन्ना मशीन नियोजीत धुंवपाच्या चक्रा भायर चलत रावता तेन्ना ताका आकांतान शेजाऱ्याचो पालव घेवचो पडटा. स्मार्ट लॉक अॅपाची सुलभताय नाशिल्ल्यान आनीक एक दिसनाशिल्लो मनीस आपल्या घरांतल्यान भायर लॉक जावन उरता.
जागतीक सुलभताय जागृताय दिसा उजवाडा हाडिल्ले श्वेतपत्रिकेंत ह्यो देखी दिल्यात. स्पर्श- सक्षम संवादांत चडांत चड वचपी उपकरणांच्या युगांत दृष्टीबाधित मनशांक दिसपट्टीं आव्हानां भेट्टात. हाका लागून जायत्या प्रकरणांनी अशे दिव्यांग आनी जाण्टे लोक असल्या वस्तूंच्या वापरा पासून वंचीत उरतात.
देखून या पेपरांत समावेशक उत्पादन डिझायन, सुलभताय प्रशिक्षण आनी दिव्यांग व्यक्तीं वांगडा उत्पादांची सह- निर्मिती वरवीं या उत्पादनांची सुलभताय सुदारपाचे वावरा खातीर वेव्हारीक मार्गांची रुपरेखा दिल्या.
गिरायक वस्तूंचें तंत्रगिन्यान जशें- जशें विकसीत जायत वता तशें- तशें, समाजांतले अशे कांय वर्ग उपेक्षित उरचे न्हय म्हणून उत्पादन कशें विकसीत करतात हाचो एक भाग म्हणून ही सुलभताय जावप म्हत्वाचें आसा, अशें एक्सआरसीव्हीसीचे कार्यकारी संचालक डॉ. सॅम तारापोरवाला म्हण्टात.
श्वेतपत्रिका जाहीर जाल्ल्यान, मुखेल प्रवाहांतल्या उत्पादनांत सक्रियपणान सुलभताय तयार करपाक, चड समावेशक उपाय संशोधन करून तयार करपाक उत्पादकांक प्रोत्साहन दिवपाची आस्त तांणी उक्तायल्या. देखीक- कॉफी विकपी मशीनांत स्पर्श चिन्न नाशिल्ल्यान दृष्टीबाधित लोक बोटां हुलपून घेतात, तेच प्रमाण ह्या चिन्नां पसून वंचित आशिल्ल्या स्मार्ट दार घांटीचो लाव तांकां मेळूंक शकना. चड स्पर्श प्रतिसाद मेळोवपा खातीर दृष्टीबाधिक मनीस चड करून पुश बटण आशिल्लीं उपकरणां पसंत करतात, अशें ह्या पेपरांत दाखयलां. ‘तशेंच, बीप वा आवाज सक्षम आवटपुट आशिल्ल्या टच- स्क्रीन इंटरफेसांत बांदल्यार उत्पादन वचड लोकां मेरेन पावूंक शकता,’अशें पेपरांत म्हणलां.
2024 वर्सा समावेशक शिक्षणाक राष्ट्रीय पुरस्कार मेळोवपी एक्सआरसीव्हीसीन ही संस्था. ह्या पेपरांत तांणी म्हणलां की राष्ट्रीय नमुनो सर्वेक्षण संघटनेच्या 2018 वर्साच्या आंकड्यां प्रमाण भारतांतली 2.2% लोकसंख्या अशा तरेची दिव्यांग आसा. महाराष्ट्र राज्य विद्याशाखा विकास अकादेमी आनी भारताच्या वेंचणूक आयोगा खातीर सुलभताय प्रशिक्षण भागीदार आशिल्लें हें केंद्र, उत्पादन उदरगतीच्या सुरवातीच्या टप्प्यांतल्यान आसपावित केल्यार सुलभताय चड प्रभावी, समावेशक आनी अर्थीक नदरेन व्यवहारीक जातली अशें दाखोवन आपलो पेपर सोंपयता.
– प्रकाश वा. कामत
94224 43093
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
