भांगरभूंय | प्रतिनिधी
पणजी: विवीध वातावरणांतल्या बदलाक लागून गोंयांत 28 मे ते 2 जून जोगलांच्या गडगडा सयत पावस पडपाची शक्यताय आसा. बुधवारा गोंयांत कांय सुवातांनी किरकोळ पावसाची नोंद जाली. गोंयांत उण्यांत उणें तापमानांत वाड कायम आशिल्ली. पणजेंत उण्यांत उणें 28.5 अंश जाल्यार मुरगांवां 28.6 अंश सेल्सियस तापमानाची नोंद जाली. फुडले स दीस गोंयांत उण्यांत उणें तापमान 27 ते 28 जाल्यार चडांत चड तापमान 34 ते 35 अंश सेल्सियस मजगतीं उरपाची शक्यताय आसा.
बुधवारा पणजेंत 34.6 अंश आनी मुरगांवां 34.4 अंश सेल्सियस चडांत चड तापमानाची नोंद जाली. गोंयांत 24 वरांत सरासरी 0.5 मिमि पावसाची नोंद जाली. 1 मार्च ते 27 मे मजगतीं सरासरी 71.8 मिमि पावसाची नोंद जाली. अंदूं मॉन्सूनपूर्व पावसाचें प्रमाण 47 टक्क्यांनी अदीक आसा.
अनुकूल वातावरण आसल्यार मॉन्सून आग्नेय अरबी दर्यो, बांगलची खाडीच्या कांय वाठारांत मुखार सरकुपाची शक्यताय आसा. मॉन्सून 26 मे मेरेन केरळांत दाखल जावपाची शक्यताय आशिल्ली. पूण पोशक वातावरण नाशिल्ल्यान मॉन्सून लांबणेर पडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
