भांगरभूंय | प्रतिनिधी
गोंयचे रस्ते जाल्यात मरणाचे सांपळे: अमरनाथ पणजीकार
पणजी: गोंय प्रदेश काँग्रेस समितीच्या मिडिया आनी कम्युनिकेशन विभागाचे अध्यक्ष अमरनाथ पणजीकार हांणी गोंयांत रेन्ट अ कार आनी रेन्ट अ बायक वाहनांक लागून वाडत चलिल्ल्या अपघातांच्या घडणुकां विशीं भाजप सरकाराचेर खर टिका केली.
सरकारा कडल्यान वाहन भाडें वेवसायाचेर प्रभावी नियंत्रण आनी देखरेख दवरपाक अपेस आयिल्ल्यान खूबशा निरपराध लोकांनी आपलो जीव व्हगडायलो आनी कितलेशेच जाण गंभीर जखमी जाले अशें पणजीकार हांणी म्हणलें.
तांणी मुखार म्हणलें, सद्याची वेवस्था सामकी घातक जाल्या. कारण वाहन भाड्यान दितना फक्त वैध ड्रायव्हींग लायसन्स तपासतात. पूण प्रत्यक्षांत खूबशे फावटी वाहन चलोवपी वा दुचाकी चलोवपी व्यक्ती ही लायसन्स नाशिल्ली, फावो तो वाहन चलोवपाचो अणभव नाशिल्ली आनी येरादारी नेमांची महायती नाशिल्ली आसता. ह्या निश्काळजीपणाक लागून गोंयचे रस्ते घातक जाल्यात.
सेगीत जावपी अपघात आनी वाडटो लोकांचो हुस्को आसून लेगती असंवेदनशील येरादारी मंत्री मॉवीन गुदिन्हो आनी येरादारी खात्याचे अधिकारी निश्क्रीय आनी उदासीन रावल्यात. तांचे प्राधान्य भौशीक सुरक्षा वा अपघात आडावप नासून, तांच्या कारभारांतल्यान मिशन टोटल कमिशनचे संरक्षण जायत आशिल्ल्याचें दिसता अशें पणजीकार हांणी म्हणलें.
भाजप सरकार रेन्टल वाहन वेवसाया खातीर खर पडटाळणी प्रणाली, डिजिटल ट्रॅकींग यंत्रणा आनी जबाबदारी निश्चीत करपी निकश निर्माण करपाक पुरायपणान अपेशी थारलां. हाचो परिणाम पर्यटक, थळावे नागरीक आनी चलून वचप्यांचो जीव सेगीत धोक्यांत येत आसा अशेंय तांणी मुखार उलयतना म्हणलें.
अमरनाथ पणजीकार हांणी प्रस्न उपस्थीत केलो की, प्रशासनांतले गंभीर त्रुटींक लागून जायत आशिल्ल्या निरपराध लोकांच्या मृत्यूची जबाबदारी भाजप सरकार स्विकारतलो?
तांणी तत्काळ फुडल्या उपाय येवजण्यो करपाची मागणी केली:
भाड्यान घेतिल्ल्या वाहनांचो वापर करपी दरेक व्यक्तीची बायोमेट्रीक आनी डिजिटल पडटाळणी बंधनकारक करप.
फक्त वैध परवानो आशिल्ल्या मनशाकूच भाड्याच्या वाहनांचें संचालन करपाची सक्ती करप.
रेन्टल एजन्सींचेर जीपीएस मॉनिटरींग आनी आनीक खर जबाबदारी प्रणाली लागू करप.
अचकीत तपासण्यो आनी नेमाक पाळो दिनाशिल्ल्यांचेर खर दंडात्मक कारवाय करप.
गोंयांत कार्यरत सगल्या रेन्ट अ कार आनी रेन्ट अ बायक वेवसायांचें तत्काळ सुरक्षा ऑडीट करप.
सरकाराची निश्काळजीपणा आनी प्रशासनांतल्या अपेसाक लागून मनशाची जीण घाताक येतली अशी बेकायदो परिस्थिती गोंयांत निर्माण जावंक दिवची न्हय अशें अमरनाथ पणजीकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
