भांगरभूंय | प्रतिनिधी
पणजी: गोंयांतल्या 13 नगरपालिका आनी एका म्हानगरपालिके वतीन विवीध सेवा ऑनलायन पद्दतीन दितात. हाका लोकां कडल्यान बरो प्रतिसाद मेळटा. चालू अर्थीक वर्सांत ऑनलायन सेवा घेवपा खातीर लोकां कडल्यान 11.52 कोटी रुपयांचें ऑनलायन पेमेंट केले. हातूंत सगल्यांत चड 5.98 कोटी रुपयांचे पेमेंट पणजी म्हापालिका वाठारांतल्या नागरिकांनी केले. जाल्यार मडगांव पालिका वाठारांतल्या नागरिकांनी ऑनलायन सेवां खातीर 2.70 कोटी रुपयांचे पेमेंट केल्यात.
ऑनलायन सेवां मदीं जल्म आनी मृत्यू दाखलो मेळोवप, घरपटी भरप आनी वेपार परवानो घेवप ह्या सुविधांचो आस्पाव आसा. मेळिल्ले म्हायती प्रमाण 2026-27त आतां मेरेन 20,628 सेवा ऑनलायन पद्दतीन दिल्यात. हातूंतले 31 टक्के म्हणल्यार 6,464 ऑनलायन पेमेंट मडगांव पालिका वाठारांत जाल्यात. ह्या क्रमवारीत पणजी म्हानगरपालिका दुसऱ्या स्थानार आसा. हांगा 5,134 ऑनलायन पेमेंट केल्यात. हाचे उपरांत मुरगांव नगरपालिकेंत 3,864, म्हापशें पालिकेंत 2,055 जाल्यार फोंडें नगरपालिकेंत 1,286 ऑनलायन पेमेंट केल्यात.
सगल्यांत उणें 24 ऑनलायन पेमेंट पेडणें पालिकेंत जाल्यात. हाची रक्कम 33,739 रुपया आसा. हाचे उपरांत सांगें (29), वाळपय (35), केपें (180), सांखळी (226), काणकोण (251), दिवचल (320), कुंकळळी (336) ह्या नगरपालिकांचो क्रमांक लागता.
ऑनलायन पद्दतीन जल्म तशेंच मृत्यू दाखले दिवपाक मडगांव पालिका मुखार आसा. हांगासरल्यान 9,146 जल्म दाखले जाल्यार 2077 मरणाचे दाखले दिल्यात. हाचे उपरांत म्हापशें पालिका (3,488) आनी पणजी म्हापालिका (2827) हांचो क्रमांक लागता. पणजी म्हापालिकेन सगल्यांत चड 105 नवे वेपार परवाने ऑनलायन पद्दतीन दिल्यात.
—
27 हजार जल्म दाखले
वयल्या काळांत पणजी म्हापालिका आनी हेर पालिकांनी ऑनलायन पद्दतीन 27,865 जल्म दाखले, 8,270 मरणाचे दाखले, 469 नवे वेपार परवाने जाल्यार 662 नव्या घटपटी खातीर परवाने दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
