भांगरभूंय | प्रतिनिधी
पणजी : म्हज्या बापायन जनसंघा वरवीं सुरू केल्लें समाजकार्य आजीवन चालूच दवरलें. बापाय वांगडा नवी दिल्लींत सेवा तिर्थाचेर प्रधानमंत्री नरेंद्र मोदी हांची भेट घेवप हो म्हजे खातीर सामको समाधान दिवपी खीण, अशें मुख्यमंत्री डॉ. प्रमोद सावंत हांणी म्हणलें.
मंगळारा रातीं दिल्लीक गेल्ले डॉ.सावंत हांणी आयज कुटुंबा सयत प्रधानमंत्री मोदी हांची भेट घेतली. ह्या वेळार तांचे बाबा पांडुरंग सावंत हांचे वांगडा मुख्यमंत्र्यांची घरकान्न सुलक्षणा आनी तांची धूव हाजीर आशिल्ली.
चार दिसां पयलीं प्रदेश अध्यक्ष दामू नायक हांचे सयत दिल्लीक भेट दिले उपरांत मुख्यमंत्री परत दिल्लीक गेल्ल्यान हे भेटी विशीं राजकी मळार उत्सुकताय वाडल्या. एसटी आरक्षणाच्या कार्यवाही सयत मंत्रिपदा विशीं केंद्रीय फुडार्यां वांगडा मुख्यमंत्री चर्चा करतले, अशी अपेक्षा आसा. प्रधानमंत्री मोदी हांच्या नेतृत्वा खाला भाजप सरकाराक १२ वर्सां पुराय जाल्यांत. ह्या निमतान विंगड विंगड मळार कार्यावळी जातल्यो. हे फाटभूंयेर डॉ. सावंत हांणी प्रधानमंत्र्याची भेट घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
