भांगरभूंय | प्रतिनिधी
भारताचो ऑलिम्पीक चॅम्पियन नीरज चोपडान आनीक एक इतिहासीक प्रदर्शन करीत लुसान डायमंड लीग 2022चेर नांव कोंतरायलें. ही सर्त जिखपी नीरज भारताचो पयलो अॅथलीट थारलो. नीरजान 89.08 मिटराच्या पयल्या थ्रोंत लुसान डायमंड लिगेंत जैत जोडलें.
हाचे खेरीत डायमंड लीग फायनल्सा खातीर तो पात्र थारलो. ही सर्त 7 आनी 8 सप्टेंबराक स्वित्झर्लेण्डाच्या झ्युरीचांत जातली. तशेंच फुडल्या वर्सा जावपी संवसारीक अॅथलेटिक्स वस्तादपण सर्तीक लेगीत तो पात्र जालो.
फाटल्या म्हयन्यांत जाल्ले संवसारीक वस्तादपण सर्तींत रुप्या पदक जिखिल्लें. पूण, खेळा वेळार ताचे फाटीक दुखापत जाल्ली. ताका लागून ताणें राष्ट्रकूल खेळां सर्तींतल्यान फाटीं सरपाचो निर्णय घेतिल्लो.
नीरजा पयलीं डिस्कस थ्रोवर विकास गौडान डायमंड लिगेंत पयल्या तिनांनी सुवात मेळयिल्ली. गौडान 2012 न्युयॉर्क आनी 2014 दोह हातूंत दोन खेपे दुसरी सुवात मेळयिल्ली. हाचे खेरीत 2015त शांघाय आनी युजिनांत जाल्ले सर्तींत दोन खेपे तिसरी सुवात मेळयिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
