भांगरभूंय | प्रतिनिधी
रेनकोटा खातीर 500, गणभेसा खातीर 600 रुपया
पणजी: गोंय मुख्यमंत्री शिक्षा सुविधा येवजणे खाला गोंयच्या सरकारी मुळाव्या शाळांतल्या पयली आनी तिसरीच्या विद्यार्थ्यांक गणभेस आनी रेनकोटा खातीर 1,100 रुपयांची अर्थीक मजत करतले. गोंयांतल्या 8,200 विद्यार्थ्यांक हे येवजणेचो लाव मेळटलो. हातूंत रेनकोटा खातीर 500 रुपया आनी गणभेसा खातीर 600 रुपया अशें वट्ट 1,100 रुपया थेट विद्यार्थ्यांच्या खात्यांत जमा जातले. निधीचें वितरण 15 जुलय मेरेन पुराय करपाची सुचोवणी शिक्षण खात्यान सहाय्यक जिल्हो शिक्षण निरिक्षकांक (एडीईआय) केल्या.
खात्याचे संचालक शैलेश झिंगडे हांणी काडिल्ल्या परिपत्रकांत म्हणलां की, शिक्षण खात्यान गोंय मुख्यमंत्री शिक्षा सुविधा येवजणे खाला आधार आदारीत पेमेंट सिस्टमा वरवीं (एबीपीएस) अर्थीक सहाय्यक वितरणाची प्रक्रिया सुरू केल्या. हाका लागून पात्र लावार्थ्यांक पावस सुरू जावचें पयलीं ही मजत थेट लाव हस्तांतरीत जातली. सरकारान सगल्या 12 तालुक्यांच्या सहाय्यक जिल्हो शिक्षण निरिक्षकांच्या एचडीएफसी बँक खात्यांत पात्र विद्यार्थ्यांच्या खात्यांत फुडल्या हस्तांतरणा खातीर रु. 90 लाख 20 हजार वितरीत केल्यात.
शासकी मुळाव्या शाळांनी शिकपी यत्ता पयली आनी तिसरीच्या दरेक विद्यार्थ्याक रेनकोट खरेदी करपा खातीर 500 रुपया जाल्यार शालेय गणभेसा खरेदी करपा खातीर 600 रुपया दितले. सगल्या एडीईआय आनी शासकी मुळाव्या शाळांच्या मुखेल्यांनी निधीची पडटाळणी आनी वितरणाची प्रक्रिया गतीन पुराय करची. ही प्रक्रिया 15 जुलय 2026 दिसा वा ताचे पयलीं पुराय जातली हाची खात्री करप गरजेची आसा. पात्र विद्यार्थ्यांच्या पालकांनी संबंदीत शाळां कडेन समन्वय सादचो. पालकांनी येवजणे खाला लावांचे सुरळीत आनी तत्काळ हस्तांतरण जावपा खातीर आधार-संलग्न बँक खात्याचो तपशील सादर केल्ल्याची खात्री करची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
