भांगरभूंय | प्रतिनिधी
पणजी: एसटी आरक्षणा सयत हेर म्हत्वाच्या विशयांचेर चर्चा करपा खातीर मुख्यमंत्री डॉ. प्रमोद सावंत हे मंगळारा दिल्ली गेले. दिल्लींत केंद्रीय मंत्र्यांच्यो भेटी घेवन म्हत्वाच्या विशयांचेर ते चर्चा करतले.
येता ते विधानसभा वेंचणुके पयलीं विधानसभेंत एसटी आरक्षण लागू करपाची घोशणा मुख्यमंत्र्यांनी प्रेरणा दिसाच्या कार्यावळींत केल्ली. एसटी आरक्षणाच्या कार्यवाहे खातीर केंद्रा कडल्यान अधिसुचोवणी जारी जावपाची गरज आसा. हाचे खातीर मुख्यमंत्री केंद्रीय गृह मंत्री अमीत शाह हांची भेट घेवपाची शक्यताय आसा. प्रधानमंत्री नरेंद्र मोदी हांच्या फुडारपणा खाला एनडीए सरकारान 12 वर्सांचो कार्यकाळ पुराय केला. हे निमतान राज्यात कार्यावळी जातल्यो. हे विशीं लेगीत चर्चा जातली.
भाजपाच्या कोर समितीची बसका मंगळारा जाली. हे बसकेक प्रदेश अध्यक्ष दामू नायक, मुख्यमंत्री डॉ. प्रमोद सावंत तशेंच हेर वांगडी हाजीर आशिल्ले. हे बसकेंत 12 वर्सां पुराय करपा खातीर एनडीए सरकाराक परबीं दिवपी थाराव संमत जालो. तशेंच एसटी आरक्षणाची फाटपुरवण करपा विशीं लेगीत चर्चा जाली. बसके उपरांत मुख्यमंत्री दिल्ली वचपाक गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
