भांगरभूंय | प्रतिनिधी
10.75 हॅक्टर पडींग जमीन लागवडी खाला
पणजीः 2025-26 ह्या अर्थीक वर्सांत गोंयची 10.75 हॅक्टर पडींग जमीन लागवडी खाला आयल्या. फाटल्या वर्साचे तुळेन पडींग जमीन लागवडी खाला येवपाचें प्रमाण बरेंच वाडलां. 2024-25साचे तुळेन अंदूं पडींग जमीन लागवडी खाला येवपाचें प्रमाण 59 टक्क्यांनी वाडलां, अशी म्हायती शेतकी संचालनालयातल्या वरिश्ठ अधिकाऱ्यान दिली.
पडींग जमीन लागवडी खाला हाडपा खातीर आनी गोंयकारांक परतून शेतांनी देंवपाक प्रोत्साहन दिवपा खातीर शेतकी खात्यान विवीध पावलां उबारल्यांत, अशी म्हायती शेतकी खात्यातल्या वरिश्ठ अधिकाऱ्यान दिली.
हाचोच एक भाग म्हूण शेतकी खात्यान पडींग शेतां ओपपां खातीर एक खेपेचे सहाय्य (वन टायम एसीटन्स) ही येवजण चालीक लायल्या. शेतांतली नडणी काडून ताची मशागत करून ती पिकावळ योग्य करपा खातीर दर शेतकारांक दर हॅक्टरा फाटल्यान रु. 15,000 मेरेन अनुदान शेतकी खातें दिता. ह्या अनुदाना खातीर खूबशे शेतकार परतून शेतांनी देंवून शेतां पाचवीं करपाक लागल्यात. हातूंत माक्नाचो आनी मानायाचो वापर करून नडणी काडून, जोत लावपा खातीर हें अनुदान मेळटा, अशी म्हायती वरिश्ठ अधिकाऱ्यान दिली.
अंदूंच्या वर्सा 2025-26त शेत जमीन पाचवीं करपा खातीर 11 शेतकारांक अनुदान दिवन सरकारान 1.61 लाख रुपया खर्च केल्यात. सरकारान अर्थसंकल्पांत हे येवजणे खातीर 2.58 लाख इतली तरतूद केल्ली, पूण तातूंतलो फक्त 62.40 टक्के निधीचो वापर हे येवजणेचेर जाला, अशी आंकडेवारी अधिकाऱ्यान दिली.
फाटल्या वर्साचे तुळेंत अंदूं पडींग जमीन लागवडी खाला येवापचें प्रमाण बरेंच वाडलां. वर्स 2024-25त 10 शेतकार परतून शेतांत देंवले आनी तांणी 6.76 हॅक्टर इतली शेत जमीन पिकावळी खाला हाडली. हे खातीर सरकारान 1.06 लाख इतलें अनुदान ह्या शेतकारांक दिल्लें. पूण ह्या वर्सा एका शेतकाराचो आंकडो वाडला आनी शेतांचे लागवडीत 3.99 हॅक्टर इतली वाड नोंद जाल्या.
हे येवजेणे खातीर फाटल्या स वर्सांत गोंय सरकारान 21.61 लाख इतलें अनुदान 118 शेतकारांक दिवन तांणी आपली 146.79 हॅक्टर इतली सुवात लागवडी खाला हाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
