भांगरभूंय | प्रतिनिधी
आरजी पक्षांत फूट पडप हें दुर्दैव म्हणचें पडटलें. आतां ही फूट कित्याक पडली, हाका जबाबदार कोण हाची जाप अजून मेरेन मेळूंक ना. आरजीचो एकसुरो आमदार अजून हे गजालीचेर कांयच उलयना वा आपली भुमिका स्पश्ट करिना. तो तरी पक्षांत रावतलो काय वेगळी वाट धरतलो तेंय अजून सारकें कळूंक ना. आपूण गोंयां भायर आसां आनी येतकूच उलयतलों म्हणपाचें तो सांगतालो. आतां तो म्हणटा मनोज परब आपलो फुडारी आनी ताच्या राजिनाम्यान आपणांक दुख्ख भोगलां. आतां हातूंत खरें कितलें तें कळप कठीण. हें दुख्ख उक्तावपाक चार दीस कित्याक लागचे? आनी दुख्ख जालांच जाल्यार तें तोंडान सांगचे परस ताचे म्हऱ्यांत वचून ताका परतो पक्षांत हाडपाचें काम कित्याक केलें ना काय?
तसो मनोज आपलो राजकी गुरू म्हणपाचें हाचेय पयलीं विरेश बोरकारान सांगिल्लें आसा. जर विरेश मनोजाक खऱ्यांनीच राजकी गुरू, फुडारी बी मानता जाल्यार ताणें पक्षांत खावटें पडचे पयलींच तें पुरोवपाचे येत्न करूंक नाका आसले? सोशल मिडियाचेर फारार फार करचे जाग्यार सगले जमून एका जाग्यार बसका घेवन हाचेर उपाय काडूंक नाका आसलो? पूण विरेश इतले दीस तोंड धांपून रावलो. मनोजान अध्यक्षपद आनी पक्ष सोडपाची घोशणा केली तरी तो चुपूच आसलो. घडये ‘मौने कलह नसते’ म्हणून तो चूप आसलो काय? कळप कठीण. आतां ताणें मौन सोडलां आनी परतून एकदां मनोजूच आपलो फुडारी म्हणलां म्हणटकूच मुखार कितें जाता तें पळोवप इतलेंच आमी करपाचें.
तशें सुरवेक दिशिल्लें आरजीचो सुप्रिमो फक्त राजिनाम्याची घोशणा करतलो पूण प्रत्यक्षांत तशें कांयच घडचें ना. तो आपणालो खुंटो हालोवन हालोवन घट करूंक पळेता. पूण ताणें राजिनामो दिवन आपूण आपणाल्या उलोवपाचेर कितलो गंभीर आसा तें दाखोवन दिलें. उपरांत दिसलें कार्यकरणी ताचो राजिनामो मानून घेवची ना. ताच्या साथिदारांच्या दोळ्यांतलीं दुकां तर तेंच सांगतालीं. पूण कितें जालें देवाक खबर, मातूय वेळ व्हगडाय नासतना ताचो राजिनामो मानून घेतलो. आतां पक्ष अध्यक्षाविणेंच आसा. फूट पडली आरजींत. तांच्या कार्यकर्त्यांक दुख्ख जावप सभावीक. तांचो मुखेलीच पक्ष सोडून गेल्लो. सगले उबंतर पडिल्ले वरी जाले.
पक्ष उबो करप आनी तो चलोवप सोंपें काम न्हय. तरी कांय तरणाट्यांनी एकठांय येवन तें काम करून दाखयलें. गोंयकार मतदारांनीय तांकां उखलून धरले. गोंयकारांच्या ह्या पक्षा कडल्यान जायत्यो अपेक्षा आसल्यो. राजकारणांत नवे जाल्ल्यान तांचे कडसून तश्यो चुकोय जाल्यात, ना अशें न्हय पूण इतलेंय आसून तांणी काम करुनूय दाखयलां. पूण तांच्या आक्रमक सभावाक लागून कांय लोक तांचे पसून पयसूच उरले. आरजीन महाराष्ट्रांतल्या मनसे आनी शिवसेने वरी वागूंक सुरवात केली. तांणी कांय बिगर गोंयकारांक टार्गेट केले. खरें तर ह्या लोकांची आयज गोंयकारांक खूब गरज. तांचे बगर आमचीं कामां जायनात. पूण तांकां पर्याय तयार करिनासतनाच आरजीन तांकां धांवडावचेली भाशा केली. जांकां खरे धांवडावचेली गरज आसा तांचेर हात घालप आरजीक जमलें ना. हें जरी खरें आसलें तरी आरजीन आमी गोंयकारांचे राखणदार म्हणपाचें चित्र उबें केलें. पोगो सारकें बील तांणी हाडपाचो येत्न केलो. हाकाच लागून गोंयकारांक तांचे कडसून अपेक्षा निर्माण जाली. एक पर्याय म्हणून लोक तांचे कडेन पळोवंक लागले. परिणाम पयलेच वेंचणुकेंत धा प्रतिशें मतां मेळोवन तांचो एक आमदार वेंचून आयलो. हीं मतां उणीं नासलीं.
खरें तर आरजीचो मार बसलो तो काँग्रेसीक. तांचीं कांय परंपरीक मतां फुटून आरजी कडेन पावलीं. आनी हाका लागून काँग्रेसीचे जायते उमेदवार सामक्या उण्या मतांनी पडले. आरजीक लागून जायते कडेन भाजपाक फायदो जालो आनी देखून आरजीक भाजपाची बी टीम म्हणून कांय जाण पळोवंक लागले. आरजी फुटलो, मनोज परब पक्षांतल्यान भायर सरलो आनी हेर पक्षांतल्या फुडाऱ्यां मदीं कित्याक कोण जाणां भंय सो निर्माण जालो. तांच्या उलोवपा वयल्यान तरी तशें दिसता. गोंयचे मुख्यमंत्री हाचेर व्यक्त जाले. आरजीची तोखणायूय केली तांणी आनी मनोजान राजकारण सोडपाचें न्हय म्हणपाचेंय सांगलें. खरें म्हणल्यार तांकां खोशी जावंक जाय आसली. एक कटकट आपशींच सोंपली म्हणून तांकां सूऽऽ जावंक जाय आसलें. मगोच्या आमदारान कशी प्रतिक्रिया दिल्या तशीच हांचे कडल्यान येवंक जाय आसली. पूण ना. ते वेगळेंच उलयले. घडये आरजी सोंपली आनी आरजीचीं मतां काँग्रेसी कडेन परतीं गेलीं जाल्यार कितें जातलें हाचो हुस्को वा भंय तांकां आसूं येता.
तांचे कळटा पूण आपल्या पक्षांतल्यान भायर सरून सद्याक ‘न घरका न घाटका’ अशी परिस्थिती येवन राजकारणांतल्यान पयस पाविल्ल्यांकूय मनोजाच्या राजिनाम्याचो भंय कित्याक दिसलो तें कळ्ळें ना. तांकां आरजीची लॉटरी बी लागची आसली काय? तसो आपान मनोजाक उलो मारलाच पळोवया मुखार कितें जाता तें. राजकारणांत कोण कोणाचो इश्ट वा दुस्मान आसनात हें सगलेच जाणात. तशेंच आयज राजकारणांत निश्ठा बी म्हणटात तीय ना जाल्या. म्हणटकूच फाल्यां कितेंय घडूं येता. मनोज आपांत वचूं येता वा आरजीच आप वा काँग्रेसींत विलीन जावं येता. आतां विरेश कितें करता तितलेंच आमी पळोवपाचें. निमाणें आरजीचो फुडार ताचेरूच तर थारपाचो आसा. तशे वेंचणुकेक चड दीस उरूंक ना. म्हणटकूच आरजीन सारकीं बरीं पावलां मारचीं पडटलीं. लोकांच्या विस्वासाक वेर वचूंक फावना. तरूच मतां मेळटलीं न्हय!
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
