भांगरभूंय | प्रतिनिधी
मारियो मिरांडाच्या खासा स्टॅम्प कव्हराचें जातलें अनावरण
पणजी : गोंय घटक राज्य दीसाच्या सुवाळ्याक उपराष्ट्रपती डॉ. सी. पी. राधाकृष्णन हे मुखेल सोयरे म्हूण हाजीर आसतले. ह्या सुवाळ्यांत मारियो मिरांडा हांच्या कार्टुनाचे प्रदर्शन भरतलें. तशेंच कार्यावळींत मारियो मिरांडा हांच्या खासा स्टॅम्प कव्हराचें अनावरण जातलें. मुख्यमंत्री डॉ. प्रमोद सावंत हांणी ही म्हायती दिली.
उपराष्ट्रपती सी. पी. राधाकृष्णन हे २९ मे रोजी गोंयांत पावतले. शेनवारा ३० मेक सकाळीं १०.३० वराचेर कला अकादमींत घटक राज्य दिसाची मुखेल कार्यावळ जातली. गोंयांखातीर वावर केल्ल्या मानेस्तांचो गोपाळ रत्न तशेंच हेर पुरस्कारांनी भोवमान जातलो. राज्यपाल पुसापती अशोक गजपती राजू, मुख्यमंत्री डॉ. प्रमोद सावंत तशेच हेर मानेस्त कार्यावळीक हाजीर आसतले. ही कार्यावळ जाले उपरांत दनपरां १२.३० वराचेर उपराष्ट्रपती एनआयओक भेट दितले. प्रयोगशाळांची पळोवणी करपा सयत ते वैज्ञानिकांकडेन चर्चा करतलें.
मंत्रिपदाविशीं निर्णय ना
मंत्रिमंडळांत एक जागो खाली आशिल्ल्यान तो भरपाविशीं आजून निर्णय जावंक ना. मंत्रिपदाविशीं निर्णय जालो काय त्या मंत्र्या पयलीं हांव पत्रकारांक म्हायती दितलों, अशें मुख्यमंत्री डॉ. प्रमोद सावंत हांणी सांगलें.
कुंकळ्ळी ते बाळ्ळी मेरेनच्या रस्त्याच्या चौपदरीकरणा खातीर १८८० कोटी रूपयांचो निधी मंजूर करपा खातीर मुख्यमंत्री डॉ. प्रमोद सावंत हांणी प्रधानमंत्री नरेंद्र मोदी तशेंच केंद्रीय रस्ते आनी म्हामार्ग मंत्री नितीन गडकरी हांचे उपकार मानल्या. डबल इंजीन सरकारान गोंयच्यो सगळ्यो मागण्यो पुराय केल्या. येरादारीक लागून कुंकळ्ळी ते बाळ्ळी मेरेनच्या रस्त्याचेर येरादारीची सेगीत कोयंडी जाता. ह्या रस्त्याचे काम बेगीन पुराय जातलें, अशें मुख्यमंत्री डॉ. प्रमोद सावंत हांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
