भांगरभूंय | प्रतिनिधी
पणजी : केपें म्हालांतल्या मळकर्णे गांवांत हालींच्या दिसांनी विखारी सोरपांचें दर्शन घडपाक लागलां. हाका लागून हांगा भंयाचें वातावरण निर्माण जालां. दोन दिसां आदीं मळकर्णे वाठारांत साडेचार मिटर लांबायेचो ‘किंग कोब्रा’ धरिल्लो. उपरांत आयज सकाळीं एका घरांत घुशिल्लो ‘कोब्रा’ (नाग) धरलो.
मळकर्णेंच्या जैसन रिबेलो हांच्या घरांत घुसून ह्या विखारी सोरपान कोंबडेचीं पिलां खालीं. आयज सकाळीं सुमार साडे इकरा वरांचेर घरांतल्या लोकांक सोरोप दिसलो. तांणी हे विशीं थळावे पंच वांगडी फ्लेझर दा कॉस्ता हांकां म्हायती दिली. रान खात्याक म्हायती दिले उपरांत सोरोप इश्टान येवन सोरपाक धरलो.
मजगतीं, दोन दिसां पयलीं मळकर्णे पंचायत वाठारांत साडेचार मिटर लांबायेचो ‘किंग कोब्रा’ धरिल्लो. आतां ‘कोब्रा’ धरिल्ल्यान ह्या वाठारांत भंय पातळ्ळा. कोणतरी सोरोप इश्ट हे सोरोप धरून हांगा हाडून सोडटा असो दुबाव थळाव्यांनी उक्तायला. रान खात्यान धरिल्ले सोरोप लोकवस्ती पसून पयस सोडपा विशीं सोरोप इश्टांमदीं जागृती करची, अशी मागणी थळाव्यांनी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
