भांगरभूंय | प्रतिनिधी
पणजी : सामाजिक कार्यकर्ते, शिक्षणतज्ज्ञ आणि चिखली चर्चचे पॅरिश प्रीस्ट डॉ. रेव्ह. फादर बोलमॅक्स परेरा हांकां काळजाच्या आताकाक लागून मंगळारा सकाळीं ४.३० वरांचेर मरण आयलें. फाटले कांय दीस तांचेरउपचार चलताले. तांच्या मरणाची म्हायती जीएमसीचे वैजकी अधीक्षक डॉ. राजेश पाटील हांणी सकाळीं दिली. तांच्या मरणाची खबर कळटकच, पुराय गोंयचेर दुख्खाची सया पातळ्ळी.
भलायकी मंत्री विश्वजित राणे, काँग्रेस विधीमंडळ फुडारी युरी आलेमाव, आमदार अॅड. कार्लुस फेरेरा, आमदार एल्टन डिकोस्ता, आमदार अलेक्स रेजिनाल्ड, आमदार वेंझी व्हिएगस, प्रदेश भाजप अध्यक्ष दामू नायक, आदले खासदार अॅड. नरेंद्र सावयकार, काँग्रेस फुडारी अॅड. अमीत पालेकर, प्रदेश काँग्रेस अध्यक्ष अमित पाटकार, फादर एरीमितो तशेंच समाजिक आनी पर्यावरण चळवळींतल्या वावुरप्यांनी तांच्या मरणाचेर दुख्ख उक्तायलां.
मेळिल्ले म्हायती प्रमाण, शेनवारा सहलीक वचपाक फादर बोलमॅक्स वास्को रेल्वे स्टेशनाचेर आयिल्ले. थंय तांकां अस्वस्थ दिसपाक लागलें. मागीर तांकां रोखडेच जीएमसींत व्हेले. तेच रातीं उसरां तांकां काळजाचो आताक आयलो. भलायकी चडून इबाडली. दोतोरांनी तांकां व्हेंटिलेटराचेर दवरून उपचार सुरू केल्ले. पूण फांतोडेर ते भायर पडले.
बरे उपचार जाले
फादर बोलमॅक्स हांचेर गोमेकाँत बरे उपचार जाले. कांय जाण उपचारा विशीं दुबाव उक्तायतात. मात हें योग्य न्हय. तांचो वेळ आयिल्लो. देवान तांकां व्हेले. राशोल सेमीनरीत म्हजे विद्यार्थी आशिल्ले फादर बोलमॅक्स हांचें पर्यावरण चळवळींत व्हड योगदान आशिल्ले अशें फादर एरिमितो हांणी म्हणलें.
२८ वेर निमणे संस्कार
दरम्यान, फादर बोलमॅक्स परेरा हांचे कुडीचेर बुधवारा २८ मेक निमाणे संस्कार जातले. ताचे पयलीं तांची कूड चिखले आनी केप्यां (तांच्या घरा) निमण्या दर्शना खातीर दवरतले. सकाळीं ७ वरां सावन फादर परेरा हांची कूड चिखलेचे सेंट फ्रान्सिस झेवियर चर्चींत निमण्या दर्शना खातीर दवरतले. उपरांत सकाळीं १० वरांचेर प्रार्थना जातली.
उपरांत तांची कूड केपेंच्या तांच्या घरा व्हरतले. दनपरां २.३० वरांचेर तांच्या घरा कडल्यान निमाणे यात्रेक सुरवात जातली. उपरांत केपेंच्या होली क्रॉस चर्चींत दनपरां ३ वरांचेर निमाणे संस्कार जातले, अशी म्हायती सेंट फ्रान्सीस झेवियर चर्च, चिखले वतीन दिल्या.
बऱ्या उपचारांचे दिल्ले निर्देश
फादर बोलमॅक्स हांची भलायकी चिंता करपा सारकी आशिल्ल्याची म्हायती मेळटांच राज्याचे भलायकी मंत्री विश्वजीत राणे हांणी गोमेकॉच्या वरिश्ठ दोतोरां कडेन संपर्क केल्लो. हे विशीं सोमारा तांणी सोशल मिडियावेल्यान फादर बोलमॅक्स हांचेर गोमेकॉत उत्कृश्ठ वैजकी उपचार करपाचे सगळे तरेन यत्न चालू आशिल्ल्याचें सांगिल्लें. मात दुर्दैवान उपचारा मजगतीं तांकां मरण आयलें. तांच्या मरणा उपरांत भलायकी मंत्री विश्वजित राणे हांणी गोमेकॉक भेट दिवन स्थिती जाणून घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
