भांगरभूंय | प्रतिनिधी
पणजी : डॉ. रेव्ह. फादर बोलमॅक्स परेरा हांकां काळजाच्या आताकान गोंय वैजकी महाविद्यालयांत (गोमेकॉ) उपचार सुरू आसतना मरण आयलें.
शेनवारा पासयेक भायर सरिल्ले तेन्ना वास्कोच्या रेल्वे स्टेशनाचेर ताका अस्वस्थ दिसपाक लागलें. उपरांत ताका गोमेकॉंत उपचारा खातीर दाखल केल्ले. पयरचे रातीं उसरां तांकां काळजाचो आताक आयिल्लो. तांकां व्हेंटीलेटराचेर दवरिल्ले. कालूच भलायकी मंत्री विश्वजीत राणे हांणी फादर बोलमॅक्स हांचेर गोमेकॉंत सगल्यांत बरे उपचार करपाचे यत्न चालू आसा अशें सांगिल्लें. मात उपचार चालू आसतना तांणी निमाणो स्वास घेतलो. तांच्या निधनाक लागून दुख्ख पातळ्ळां.
दरम्यान, फादर बोलमॅक्स परेरा हांचे कुडीचेर बुधवारा २८ मेक निमाणे संस्कार जातले. ताचे पयलीं तांची कूड चिखले आनी केप्यां (तांच्या घरा) निमण्या दर्शना खातीर दवरतले.
सकाळीं ७ वरां सावन फादर परेरा हांची कूड चिखलेचे सेंट फ्रान्सिस झेवियर चर्चींत निमण्या दर्शना खातीर दवरतले. उपरांत सकाळीं १० वरांचेर प्रार्थना जातली.
उपरांत तांची कूड केपेंच्या तांच्या घरा व्हरतले. दनपरां २.३० वरांचेर तांच्या घरा कडल्यान निमाणे यात्रेक सुरवात जातली. उपरांत केपेंच्या होली क्रॉस चर्चींत दनपरां ३ वरांचेर निमाणे संस्कार जातले, अशी म्हायती सेंट फ्रान्सीस झेवियर चर्च, चिखले वतीन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
