भांगरभूंय | प्रतिनिधी
पदाधिकाऱ्या वांगडा चर्चे उपरांत कोफुसावांचेर उलोवप
पणजीः मनोज परब हांणी राजकी सन्यासा विशीं घेतिल्ले निर्णयान हांव दुख्खी आसा आनी तो म्हजे काळजांत आसा. पूण सद्या हे कोफुसांव पक्षाच्या अतर्गत लोकशायेचो भाग आसा. देखून हे विशींचे स्पश्टीकरण आरजीपीच्या पदाधिकाऱ्या वांगडा चर्चा केल्या उपरांतच कळटले. देखून म्हाका कसलेच बेजबाबदार उलोवप करतले, अशें रजाव सांत आंन्द्रेंचे आमदार विरेश बोरकार हांणी दिले.
फाटलो म्हयनो आरजीपी भितर शिजपी अंतर्गत कोफुसांवा वेल्यान आरजीपीचे सुप्रीमो मनोज परब हांणी आपले अध्यक्षपद आनी संस्थापक वांगडी म्हण राजिनामो दिवन राजकारणांतल्यान संन्यास जाहीर केल्लो. हे मजगती बोरकार हे वोग्गी आसले आनी चार दिसा उपरांत सोमारा तांणी विधानसभेच्या चॅँबरात घेतिल्ले पत्रकार परिशदेत मौन सोडले.
39 (ए) आंदोलना उपरांत भलायकी इबाडील्ले कारणान उपचार घेवपा खातीर भायर आशिल्लो. देखून हे घडामोडी फाटल्यान आपल्याक प्रतिक्रीया दिवपाक मेळूंक ना, अशें बोरकार हांणी सांगलें.
हे कोफुसांव पक्षाचे अंतर्गत लोकशायेचो भाग आसा. ज्यो गजाली वा आरोप जाल्यात हे विशीं पक्षाचे कार्यालयांत वचून पदाधिकाऱ्या वांगडा चर्चा करतलो. परब हांणी राजिनामो कित्याक दिलो हे विशीं पदाधिकाऱ्यां वांगडा चर्चा केलें उपरांत कळटलें. परब हांकां पक्षांत परत घेवपाचो निर्णय हांव एकलोच घेवपाक शकना, अशें आमदार विरेश बोरकार हांणी सांगलें.
हांव पक्षाचे कार्यालयांत वचून कितें प्रस्न आसा ते मांडटलो. तशेंच हेर पदाधिकाऱ्यांची बाजू आयकून घेतलो. हांव अजून मेरेन पक्षाचे कचेरेत पावूंक ना. हे चर्चेत म्हजे प्रस्न, तांचे प्रस्न आरजीपीचे प्रस्न मांडून उक्त्या बरे पद्दतीन आमी चर्चा करतले. उपरांतच हांव हे कोफुसांवाचेर उलोवप करतलो.
आमचो पक्ष भारतीय वेंचणुक आयोगा खाला नोंद जाल्या आनी कायद्या प्रमाण कोण एकलो पक्ष ताब्यांत घेवपाक शकना. मनोज हो आमचो फुडारी आनी आमी बरोबर काम करून फुडें आयल्यात. मनोजान पक्ष सोडिल्ल्याचे दुख्ख जाता. पूण आमचे मदीं किते वयर-सकयल जाले हाचेर हांव बेस्टो जाप दिवपाक सोदना. चर्चा केले खेरीत ताचेर उलोवप ह्यो घरच्यो गजाली गावार घालपा सारके जातले, अशें बोरकार हांणी म्हणलें.
हाव पक्ष सोडून काँग्रेसीन हेर पक्षान वयतल्यो अशें वावड्यो जातात पुण त्यो खऱ्यो न्हय. आरजीपी पक्ष जो आमी स्थापन केला तो आमकां गोंयकारांच्या हिता खातीर फुडें व्हरपाक जाय. आमकां काँग्रेस आनी भाजप कशी आसा ते खबर आसा. देखून दरेक वेळार हे प्रश्नाच्यो जापो ना म्हण दिल्या, अशेंय स्पश्टीकरण बोरकार हांणी दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
