भांगरभूंय | प्रतिनिधी
नितळसाणीचें काम 65 टक्के पुराय
म्हापशें: म्हापशें नगरपालिका वाठारांत पावसा पयलींचें नितळसाणीचें काम 65 टक्के पुराय केलां. कांय दिसां भितर पावस सुरू जावपाचो आशिल्ल्यान ताचे पयलीं हे गाळ उसपुपाचें उरिल्लें काम पुराय करून घेवपाचें आव्हान पालिका अधिकाऱ्या मुखार उबें रावलां.
अंदूं पालिकेन प्रभाग 20तलें गटार उसपुपाचें काम सुमार 60 लाख रुपया खर्च करून हातांत घेतलां. हें काम करपा खातीर बोलिदार कंत्राटदार मुखार येवंक नाशिल्ल्यान निश्चीत काळांत नितळसाणीचें काम सुरू करप पालिकेक शक्य जाल्लें ना.
सद्या बाजारपेठेंतलें गटार उसपुपाचें काम निमाण्या पांवड्यार पावलां. पालिका अभियंते आनी अधिकारी ह्या कामाचेर लक्ष दवरून आसात. तशेंच बाजारपेठेंतल्या हेर नाल्यांनी तेलकट गाळ सांचिल्ल्यान नितळसाणीच्या कामांत आडमेळीं येतात. हो गाळ गटारांनी सोडपी लोकांचेर कारवायेचें पावल उबारपा विशीं पालिका अधिकाऱ्यां कडल्यान विचारविनिमय सुरू आसा. जाल्यार नाल्याचेर अतिक्रमण करपी उल्लंघनकर्त्यांक पालिकेन कारणां दाखय नोटीस दिल्या.
नगराध्यक्षा प्रिया मिशाळ हांणी सांगलें, मार्केट आनी पालिका प्रभाग 20त नितळसाणीचें काम गतीन सुरू आसा. आतां मेरेन 65 टक्के काम पुराय जालां. शारांतल्या मुखेल नाल्यांची नितळसाण उदका स्रोत खात्यान केल्या. खोर्ले उसापकार जंक्शना वेल्या नाल्यांत उदकाचो निचरो सुरळीत जावन, हे खातीर पालिकेन खाशेले यत्न केल्यात.
म्हापशें पालिके कडल्यान निविदा कामाची देय रक्कम दिवपाक कळाव जायत आशिल्ल्यान अंदूं पावसा पयलींच्या कामांची निविदा घेवपाक म्हापशें आनी बार्देस म्हालांतले कंत्राटदार मुखार आयले नात. हाका लागून पालिका अधिकाऱ्यांनी हें काम करून घेवपा खातीर फोंडें म्हालांतल्या कंत्राटदाराक हाडचे पडले. वेळारूच बोलिदार मेळूंक नाशिल्ल्यान पावसा पयलीं गटार उसपुपाचें काम रखडिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
