भांगरभूंय | प्रतिनिधी
दोन सप्तकांत पेत्रोल, डिजेलचें दर ४ खेपो वाडलें
पणजी : पेत्रोलाचें दर २.६१ रूपया जाल्यार डिजेलाचें दर २.७१ रूपया वाडिल्ल्यान हेर राज्यां सयत गोंयांतूय पेत्रोल आनी डिजेल म्हारग जालां. दरवाडी उपरांत राज्यांत पेत्रोल १०३.९१ रूपया जाल्यार डिजेल ९५.८० रूपया लिटर जालां. स्पीड पेत्रोलाचो दर ११३.५२ रूपया आसा. पेत्रोल, डिजेलाचेर दर वाडिल्ल्यान जिणेक गरजेच्यो वस्तूंचें दर वाडपाची भिरांत आसा. डिजेलाचें दर वाडिल्ल्यान तिकेट दर वाडोवपाची मागणी बस धनी करपाक लागल्यात. सगळ्यांत पयलीं १५ मेयाक पेत्रोल आनी डिजेलाचो दर ३ रूपयांनी वाडयलो. हे दरवाडी उपरांत गोंयांत पेत्रोलाचो दर ९९.५० जाल्यार डिजेलाचो दर ९१.२५ रूपया जालो. हाचे उपरांत १९ मेयाक पेत्रोल आनी डिजेलाचें दर ९० पयशांनी वाडयलें. उपरांत २३ मेयाक पेत्रोलाचें दर ८७ पयशे जाल्यार डिजेलाचें दर ९१ पयशांनी वाडयलें. पेत्रोल, डिजेलाचें दर वाडत आसतना आयज सोमारा पेत्रोलाचें दर २.६१ रूपया जाल्यार डिजेलाचें दर २.७१ रूपया वाडयलां. सगळ्या दरवाडीची बेरीज केली जाल्यार पेत्रोल, डिजेल ७.५ रूपयांनी म्हारग जालां.
हेर राज्यां परस सवाय
दरवाड जावन लेगीन हेर राज्यां परस गोंयांत पेत्रोल आनी डिजेल सवाय आसा. मुंबयत पेत्रोल १११.२० रूपया जाल्यार डिजेल ९७.८० रूपया लिटर जालां. बंगळूरूंत पेत्रोल ११०.६० रूपया जाल्यार डिजेल ९८.५० रूपया जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
