भांगरभूंय | प्रतिनिधी
मडगांवः गोंयची सध्याची परिस्थिती बदलपाची आसल्यार ‘गोवा फॉरवर्ड’ हो एकूच पर्याय आसा. बेकारी, वाडत वचपी गुन्यांव, जमनीची राखण आनी हेर प्रस्नां आड एकठांय येवन बदल घडोवन हाडपाचो हो योग्य वेळ अशें गोवा फॉरवर्डाचे अध्यक्ष आनी आमदार विजय सरदेसाय हांणी स्पश्ट केलें. पक्षाच्या राज्यव्यापी वांगडी नोंदणी मोहिमेक सुरवात करतना ते उलयताले.
राज्यांतल्या तरणाट्यांक नोकर्यो नात. ज्यो नोकर्यो आसात, ताचे खातीर पयशे मागतात. हाका लागून बेरोजगारींत गोंय मुखार आसा. थळाव्यांक जर कितेंय धंदो वा वेवसाय करपाचो आसल्यार, तांकां परवानग्यो मेळचे खातीर सेगीत सरकारी कार्यालयांच्या दारार वयचें पडटा. राज्यात गुन्यांव वाडतूच आसात. बायलांचे सुरक्षिततायेचो प्रस्न गंभीर आसा. कोळसो येरादारी, लोकांच्यो जमनी हडप करप आनी रेल्वे दोट्टीकरण अशे प्रस्न प्रलंबीत आसात. राज्या भायल्या लोकांक जमनी विकतात. सत्ते खातीर धर्मीक एकवट इबाडपाचो यत्न चालू आसात. ही परिस्थिती बदलपाची आसल्यार गोवा फॉरवर्ड पक्ष होच सक्षम पर्याय आशिल्ल्याचें सरदेसाय हांणी म्हणलें.
गोवा फॉरवर्ड हो फकत राजकीय पक्ष न्हय, जांकां ’गोंयकारपण’ तिगोवन दवरपाचें आसा, तांचे खातीर ही एक चळवळ आसा, अशें सरदेसाय हांणी म्हणलें. हे मोहिमे वरवीं विजय सरदेसाय हांणी खासा गोंयचे तरणाटे पिळगेक एकठांय येवपाचो उलो मारला. आमी सदांच युवाशक्तीचेर विस्वास दवरला. तरणाट्यांनी आतां गोंयचो फुडार स्वताच्या हातांत घेवपाचो वेळ आयला, अशें तांणी म्हणलें. ’गोंय पयलें’ ह्या ब्रीदवाक्या सयत ही मोहीम राबयता. पक्षाकडल्यान अधिकृत नोंदणी लिंक जाहीर केलां. गोंयच्या हिता खातीर नागरिकांनी हे चळवळींत व्हड संख्येन वांटीकार जावचें, असो उलो सरदेसाय हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
