भांगरभूंय | प्रतिनिधी
पणजी : चिखलेचे सेंट फ्रान्सिस झेवियर चर्चचे धर्मगुरू फादर बोलमॅक्स परेरा हांची भलायकी सामकी इबाडल्या. तांकां बांबोळच्या गोमेकॉंत दाखल केल्या. सध्या ते लायफ सपोर्ट व्हेंटिलेटराचेर आसा. शेनवारा सकाळीं पॅरिश कौन्सिल आनी हेर असोसिएशनाच्या वांगड्यां वांगडा कुळ्या पासयेक वचपा खातीर फादर बोलमॅक्स वास्को रेल्वे स्टेशनाचेर पाविल्ले. थंय अचकीत तांकां अस्वस्थ दिसपाक लागलें. ते बेशुद्ध जावन सकयल पडटाले तेन्ना लागीं आशिल्ल्या तरणाट्यांनी तांकां धरले.
तांकां बेगोबेग वास्कोच्या डॅफोडिल्स हॉस्पिटलांत व्हेले आनी उपारंत फुडल्या उपचारां खातीर गोमेकॉंत धाडले. थंय तांची ईसीजी, सीटीस्कॅन आनी एक्सरे ह्यो सगल्यो गरजेच्यो तपासण्यो केल्यो. फादर बोलमॅक्स हांची आदीं बायपास सर्जरी जाल्या. सध्या तांची भलायकी स्थिर दवरपा खातीर दोतोर यत्न करतात. मात गोमेकॉंत विस्वासू सुत्रांनी दिल्ले म्हायती प्रमाण, रातीं उसरां तांकां परत काळजाचो आताक आयिल्ल्याची शक्यताय आसा. तांची भलायकी सध्या हुस्क्याची जाल्या. तांकां सध्या अतिदक्षता विभागांत तज्ज्ञ डॉक्टरांच्या देखरेखी खाला दवरल्या. पुराय गोंयांत लोक तांचे भलायके खातीर प्रार्थना करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
