भांगरभूंय | प्रतिनिधी
यदो वेवसाय हो समाजांतलो एक भोव उंच आनी मानाचो वेवसाय. कारण तो विस्वास, शिस्त, नितीमत्ता आनी जबाबदारीचेर आदारिल्लो आसा. न्यायपीठ आनी वकील हांचे मदीं परस्पर आदर आसल्यारच न्यायालयीन कामकाज सुरळीतपणान चलूंक शकता. तरणाट्या वकिलांची वागणूक आनी तांचेर जावपी संस्कारां विशीं हालींच न्यायालयान केल्ल्या निरिक्षणांनी, कायदो मळावेलीं वेवसायीक मुल्ल्यां बळकट करपाची गरज परतून एकदां मुखार हाडल्या.
‘’बार’ आनी बँच (न्यायाधीश आनी वकील) मदले संबंद बरे दवरपा खातीर आनी कायदो मळार जावपी मतभेद तशेंच गैरसमज वेळार आनी बरे तरेन सुटावे करपा खातीर, मानादीक सर्वोच्च न्यायालयान हालींच एक ‘तंटे निवारण समिती’ (Grievance Redressal Committee) स्थापन करपाचे निर्देश दिल्यात. हे समितींत न्यायपालिका, बार असोसिएशन आनी बार कावंसिलाच्या वांगड्यांचो आसपाव आसतलो. सारक्या न्यायदाना खातीर गरजेची आशिल्ली प्रतिश्ठा, शिस्त आनी समन्वय सांबाळप होच अशा संस्थात्मक यंत्रणेचो उद्देश आसा. ह्या उपक्रमांतल्यान तरणाट्यां वकिलांक योग्य मार्गदर्शन, संरक्षण आनी बुदवंतपण मेळचें. तेच वांगडा वेवसायांतली जबाबदारी, नितीमत्ता आनी शिस्तय तिगची, अशी एक वेवसायीक सुवात निर्माण करपाची गरज दिसून येता.
आयच्या काळांत वेवसायांत भितर सरपी तरणाट्या वकिलांचेर भोव व्हड दबाव आसता. ते दोळ्यांत सपनां, व्हड आशा आनी घट्ट निर्धार घेवन कोर्टांत पांय दवरतात, पूण चडशा जाणांक योग्य मार्गदर्शनाचो उणाव, आर्थिक अडचणी आनी वेवसायीक असुरक्षिततायेक तोंड दिवचें पडटा. वकिलीचीं सुरवातीचीं वर्सां खंयच्याय वकिलाच्या जिवितांतलीं सगळ्यांत कठीण वर्सां आसतात. ह्या काळांत जाणकार (सिनियर) वकील आनी न्यायपालिके कडल्यान मेळपी हुरूप, सोशिकता आनी मार्गदर्शन भोव मोलाचें थारता. तेच वांगडा, तरणाट्या वकिलांच्या कांय पंगडां मदीं निसरत चलिल्ली शिस्त आनी नितीमत्ता हाचेरय ह्या वेवसायान प्रामाणिकपणान आत्मपरिक्षण करपाची गरज आसा. निश्ठेन शिकप, कश्ट करप आनी वेवसायांत फुडें वचपाचेर भर दिवचे सुवातेर, कांय जाणा दुर्दैवान वायट चालींक बळी पडटात, जाका लागून सबंध वेवसायाच्या संस्कृतायेक गळो लागता.
सिनियर वकिलांचे गिरायक (क्लायंट) तोडपा खातीर फट उलोवप, गैरसमज निर्माण करप, वा कचेरी सोडल्या उपरांतूय स्वता खातीर स्वतंत्र केसी मेळोवपाच्या उद्देशान लायनींत रावप, असल्यो न सांगिल्ल्यो गजाली आयकूंक येतात. कांय जाण कचेरीच्या सुटायचो गैरफायदो घेतात, सिनियरांच्या गिरायकीच्या केसींची माहिती वैयक्तीक फायद्या खातीर वापरतात वा कचेरींतलो विस्वास आनी गुप्तता भंग करतात. पुस्तकां आनी कायदो साहित्य चोरप, कचेरीतल्या साधनांचो गैरवापर करप आनी जेलींनीं वचून ‘आमी अजूनय अमक्या सिनियर वकिलाच्या ऑफिसांत आसात आनी आमचे सिनियरच युक्तीवादा खातीर उपस्थित रावतले’ अशी फट मारून गिरायकांक फसयतात, अशेय आयकूंक येतात.
कायदो कचेरेंतल्या कामाच्या वातावरणाचेर परिणाम करपी आनीक एक गंभीर विशय म्हणल्यार कचेरींतल्या वेवसायीक मर्यादांचो उणाव. वांगडा काम करपी सहकाऱ्यां मदीं, तांचें लग्न जाल्लें आसूं वा नासूं, चड वैयक्तीक संबंद आनी अयोग्य मोग-मोगिकांचे संबंद निर्माण जाल्ल्यान चड प्रमाणांत वाद, चित्त विचलीत जावप, मानसीक ताण आनी ऑफिसांतलें राजकारण जावंक लागता. हाका लागून कायदो वेवसायांत अपेक्षित आशिल्ली शिस्त आनी वातावरण बिघडटा. एक लॉ कचेरी ही फकत कामाची सुवात न्हय, तर तें शिकप, विस्वास आनी जबाबदारीचें क्षेत्र, जंय वेवसायीक वागणूक आनी परस्पर आदर सदांच उरपाक जाय.
पूण, सगळी जबाबदारी फकत ज्युनियर वकिलांचेरच उरना. सिनियर वकील आनी लॉ ऑफिसांनीय जुनियरांक मेळपी वागणुकी विशीं खोल विचार करपाक जाय. कितलेशेच तरणाटे वकील व्हड दबावा सयकल खूब वेळ कश्ट करतात, पूण तांकां फावो तें वा सामकेंच कमी आर्थिक मानधन मेळता. चडशा कचेऱ्यांनी जुनियरांनी मसुदा तयार करप (ड्राफ्टिंग), संशोधन (रिसर्च), गिरायकां कडेन समन्वेव सांबाळप आनी कोर्टांतलें काम हातूंत मोलाचें योगदान दिल्ल्या उपरांतूय, ‘फुडारांत शिकूंक मेळटलें आनी अणभव मेळटलो’ अशा उतरांचेरच जगपाची अपेक्षा धरतात.
आर्थिक प्रतिश्ठा हो वेवसायीक प्रतिश्ठेचो एक म्हत्वाचो भाग. एक ज्युनियर वकील जो अती कामाक लागून थकला, जाका योग्य मोबदलो मेळना आनी जो अर्थीक नदरेन असुरक्षित आसा, ताच्या कडल्यान वेवसायांत लांब काळ टिकून रावपाची आनी शिस्त दवरपाची अपेक्षा दवरूंक मेळना. योग्य मानधन दिवप हो काय दानधर्म न्हय; तर तो तांच्या कश्टांचो, निश्ठेचो आनी योगदानाचा सन्मान आसा. जे सिनियर आपल्या ज्युनियरां कडल्यान प्रामाणिकपणा, शिस्त, गुप्तता आनी कमिटमेंटाची अपेक्षा दवरतात, तांणी तांकां योग्य मोबदलो, आदरयुक्त वागणूक आनी मानवी कामाची परिस्थिती दिवकच जाय.
सिनियर आनी ज्युनियर वकिलांतलो संबंद हो पारंपारिकपणान मार्गदर्शन, विस्वास आनी वेवसायीक दिक्षा हांचो आसला. जुनियर हे सिनियरांचेर देख दवरून वर्सांनुवर्साच्या अणभवांतल्यान वकिली, मसुदा तयार करप (ड्राफ्टिंग), नितीमत्ता आनी कोर्टाचे डावपेच शिकतात. जेन्ना हो संबंद जुनियरांच्या अविश्वासाक लागून वा सिनियरांच्या शोशणाक लागून कमजोर जाता, तेन्ना सबंध वेवसायाक लुकसाण जाता.
न्यायदान व्यवस्थेचो फुडार हो फकत घटमूट न्यायालयांचेरच न्हय, तर एका शिस्तबद्ध, नितीवान आनी आर्थिक नदरेन सुरक्षित आशिल्ल्या वकील मळाचेर (बार) आदारून आसता. तरणाट्या वकीलांक हुरूप, संद, मार्गदर्शन आनी मानाची गरज आसा. तेच वांगडा, वेवसायांत निश्ठा, प्रामाणिकपणा, शिस्त आनी वेवसायीक नितीमत्ता सांबाळपाची जबाबदारीय तांचेर आसा.
कायदो वेवसाय हो फकत कायदो गिन्यानाचेर जगूंक शकना. तो मनशाचो स्वभाव, सचोटी आनी परस्पर आदराचेर उरता. जेन्ना सिनियर जबाबदारीन मार्गदर्शन करतात आनी ज्युनियर नितीन वागतात, तेन्नाच ह्या मानाच्या वेवसायाची प्रतिश्ठा आनीक अभिमानान फुडें चलत रावतली.
( लेखांतलीं मतां वैयक्तीक आसात. वकिलाक, ऑफिसाक वा संस्थेक रोखून हो लेख बरयिल्लो ना.)
अॅड. विनायक द. पोरोब
9923146840
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
