भांगरभूंय | प्रतिनिधी
पणजी : आनीक सोंसू नेजो (इनाफ इज इनाफ) हे चळवळी खाला गोंय घटक राज्य दिसा निमतान पणजे आझाद मैदानाचेर महासभा घडोवन हाडटले. गोंयभरांतल्या लोकांनी एकठांय जावन हे सभेंत गोंयां खातीर झगडपाची आपली तांक दाखोवची. हे बसकेंत आमी आमचे सगळे राजकी पक्षाच्या अध्यक्षांक आपोवन आमच्या 10 मागण्यांच्या चार्टराक तेंको दिवपाचो उलो मारतले, अशी म्हायती न्या. फेर्दीन रिबेलो हांणी दिली.
आमी 30 मेक गोंय घटक राज्य दिसा निमतान आझाद मैदानार एकठांय जातले आनी हें सभेंत दोन विशय मांडटले.
आमी एक विधेयक सगळ्या राजकी पक्षाक दिल्लें. उपरांत हें विधेयक सगळ्या विरोधी पक्षांनी सभाघरांत मांडिल्लें. पूण फोंडें वेंचणुकेक लागून विधानसभा सोंपयली. देखून हें अधिवेशन बेगिनूच आपोवचें आनी विधेयकाचेर चर्चा करपाची मागणी हे सभेंत जातली, अशें रिबेलो हांणी सांगलें.
दुसरो विशय 2022-23 वर्सा गोंय सरकारान हाडिल्ल्या तीन कायद्यांचो आसतलो. हातूंत कलम 39 अ रद्द करप, कलम 17 (2) आनी 17 (अ) भितर सुदारणा करप तशेंच गोंय जमीन महसूल कायद्यांत बदल करून शेत जमनींची राखण करपाचो कायदो चालीक लावपाचेर मागणी जातली, अशें रिबेलो हांणी म्हणलें.
आमी कोलवाचे बसकेंत सांगिल्लें, हो प्रांत कोंकणी लोकांचो. आमी खंयची भास उलोव कोंकणी, मराठी वा इंग्लीश, पूण निमाणे आमी कोंकणी लोक. गांव हो कोंकणी लोकांचोच उरपाक जाय आनी आमच्याच गांवांत आमी भायले जावपाक जायनात, अशें मत रिबेलो हांणी मांडलें.
देशाचे दरेका प्रांतांत भारताचे लोक प्रादेशीक वळख सांबाळटात तेच भशेन गोंयकारांनी आपली प्रादेशीक वळख सांबाळपाक जाय. गोंयकारांनी पयली खूब त्याग केल्यांत. त्रिस्तांव कुन्हा हांणी मुक्तीचो लडो सुरू करून गोंयाक भारताचो भाग केलो. जॅक सिक्वेरा हांणी ओपिनियन पोला वरवीं गोंयाक अस्मिता दिली आनी कोंकणी चळवळी वेळार भास आनी प्रांत सांबळ्ळो. आतां आमी फुडाराक गोंय बदलपाक दिवचे नात, अशी शिटकावणी रिबेलो हांणी दिली.
भ्रश्टाचाराचेर आवाज काडचो
स्वप्नेश शेर्लेकार हांचेर भाजप आनी अभाविपान कागाळी दाखल केल्यात. आमकां मेळिल्ले म्हायती प्रमाण हे कार्यकर्ते मुख्यमंत्र्याच्या घरातल्यांन भायर सरून दिवचले पुलीस स्टेशनार गेल्यात. जर तुमकां गोंया खातीर मोग आसा जाल्यार भ्रश्टाचार आड झगडात अशें कार्यकर्त्यांक सांगपाक सोदतां. कॅसिनो हे न्हंयेंतल्यान भायर वचपाक जाय म्हूण कायदो आसा. ते अजून मांडवींत कित्याक असो प्रस्न कार्यकर्त्यांनी मंत्र्याक विचारपाक जाय, असो सल्लो रिबेलो हांणी दिलो.
विश्वजीत राणे हांकां आव्हान
परवानगी बगर बांदकाम करपी स्वताच्या कार्यकर्त्यांचेर नगर नियोजन मंत्री विश्वजीत राणे कसलीच कारवाय करिनासतना आमच्या वांगड्यांक लक्ष्य करता. जे त्रास राणे हांणी कारापूर आनी केरीच्या लोकांक दिल्यांत ताचे आड घटनात्मक पद्दतीन कायदेशीर प्रक्रिये वरवीं आमी राणे हांचे आड लडो दिवन तांकां उक्तडार हाडटले, अशी शिटकावणी न्या. फेर्दीन रिबेलो हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
