भांगरभूंय | प्रतिनिधी
भावंडांनो
तुमचे नदरेक नवी वस्त दिसली की तुमी तिची बारकायेन पळोवणी करतात. ती तुमकां नवी दिशिल्ल्यान तुमी तिचे विशींचे साबार प्रस्न तुमच्या घरच्यांक विचारीत रावतात. तुमच्या मनाक पट सारकी जाप मेळसर तमि प्रस्न विचारीत रावतात. तें कितें? कित्या खातीर आसा? कशें केलां? कोणें केलां? आनी अशे तरेचे साबार प्रस्न तेन्ना उप्रासतात. तशें ते प्रस्न विचारप चुकीची वा बेशिस्तीची गजाल न्हय. ते उमळशिकेंतल्यानूच तुमी तुमच्या भोंवतणी संशोधनांचीं बियां रुजोवंक पावतात. समाजा खातीर कितें तरी घडोवंक पावतात.
भावंडांनो, आयज हांव तुमकां अशेच तरेच वागपी दोगा भावांची याद करून दितां, जे फुडाराक व्हड मनीस जाले. पुराय संवसारांत नामनेक पावले. कोण जाणात तुमी? हय. बरी याद उरली तुमकां. ते दोग भाव म्हणल्यार ओर्वील आनी विल्बर रायट भाव. हय तांणी विमानांचो सोद लायलो.
भावंडांनो, दोगूय भुरगेपणांतूच खूब हुशार. तांच्या बापायची कामावेल्यान वेगवेगळ्या गांवांत बदली जायत आसताली. ताका लागून ते दोगूय भाव एकाच शाळेंत केन्ना उरले नात. बापायचे बदलेक लागून शाळा बदलत रावल्यो. ताका लागून तांचें शिक्षणाचेर लक्ष स्थीर उरलें ना. पुणून घरांतल्यो वा भोंवतणच्यो पोरण्यो वस्तू दुरुस्त करप वा तसलेच तरेच्यो नव्यो वस्तू घडोवप, अशा वावरांत ते सदांच चड वेळ घालयताले. लुगटां, बडयो हांच्या आदारान पतंग करप, ते वयर हुबोवप, पोरण्यो सायकली नवे पद्दतीन दुरुस्त करप होच तांचो वावर आसतालो. पोरण्या सामानांचो वापर करून तांणी छापखानो लेगीत उबारलो. तातूंतल्यान ते पयशे जोडपाक लागले.
भावंडांनो, सवणीं कशीं मळबांत उडटात हाचें निरिक्षण करून मळबांत उडपाचें सपन तांणी बाळगिलें. तशे तांणी आपले यत्न चालू दवरले. सुमार बारा उड्डाणा उपरांत तांकां हवेंत दोन मिण्टां रावपाक येस मेळ्ळें. पूण खऱ्या अर्थान तांकां येस मेळ्ळें तें 1905 वर्सा. तांणी केल्ल्या विमानाच्या यंत्रान हवेंत 18 मिण्टां रावपाक येस मेळ्ळें. तांणी इकरा मैल अंतर हुंपले. 2 ऑक्टोबराक पाऊणवर हवेंत रावून 24 मैल अंतर हुंपपा तांणी जैत जोडलें. निमण्या आपल्या यंत्रांत सुदारणा करीत तांणी संवसाराक विमानाचें योगदान दिलें. युरोप, फ्रांस, अमेरिका देशान तांचे भोवमान केले.
विमानाचे संशोधक म्हूण पुराय संवसारांत तांकां मानून घेतले. भावंडांनो, विल्बराक 45 वर्सां पिरायेचेर 29 मेक मरण आयलें. जाल्यार ओर्विल 76 व्या वर्सा 30 जानेवारीक 1948 दिसा ह्या संवसाराक अंतरले. ह्या सप्तकांत 29 मे दिसा आमी तांची याद काडून तांकां आदरांजली ओंपुया आं. उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
