भांगरभूंय | प्रतिनिधी
मनोज परबाच्या राजिनाम्याक लागून रिव्होल्युशनरी गोवन्स पक्षाच्या (आरजी) राजकारणांत बोवाळ निर्माण जाला. थळावी अस्मिताय, जमनीच्या मालकांचे हक्क, सांस्कृतीक अस्मिताय आनी गोंयांत वाडत वचपी भायल्या हस्तक्षेपा आड उबो आशिल्लो हो पक्ष फाटल्या कांय वर्सांत तरणाट्यां मदीं खासा लोकप्रिय जाल्लो. ह्या पक्षाची वळख फकत राजकी संघटने पुरती मर्यादीत नाशिल्ली, पूण गोंयचे मातयेक आनी थळाव्यांच्या भावनांक जोडिल्ली चळवळ मानताले. अशे परिस्थितींत पक्षाचे अध्यक्षपद सोडपाचो निर्णय फकत वैयक्तीक न्हय तर पक्षाच्या फुडारा खातीर धोक्याचो थारूंक शकता.
मनोज फकत पक्षाचो फुडारी न्हय, तो पक्षाचें मुखामळ आशिल्लो. ताचे आक्रमक उलोवपाचे शैलीक लागून, थळाव्या प्रस्नांचेर घट्ट उबो रावपाक लागून आनी सामान्य तरणाट्यां मदीं निर्माण जाल्ल्या विस्वासाक लागून आरजी पक्षान थोड्याच काळांत एक वेगळी अस्मिताय निर्माण केली. जायते तरणाटे गोंयांतल्या पारंपरीक राजकारणाक पर्याय म्हणून ह्या पक्षा कडेन पळयताले. थळावो रोजगार, जमनीची राखण, पर्यटनांत असंतुलीतपण, भायल्या लोकांचें वर्चस्व वाडप, गोंयचे संस्कृतायेचेर जावपी परिणाम अशे प्रस्न तांणी सातत्यान मांडले. ताका लागून पक्षाचें बळगें चड करून ताच्या फुडारपणा भोंवतणी केंद्रीत आशिल्लें.
अशा वेळार ताणें अध्यक्षपदाचो राजिनामो दिवप ही एक व्हडली राजकी चूक. कारण खंयच्याय नव्या पक्षाक सातत्यान फुडारपण खूब म्हत्वाचें. पोरण्या आनी अर्थीक नदरेन घटमूट पक्षांक तोंड दितना नव्या पक्षाक संघटनात्मक स्थिरताय जाय. मनोज परबाच्या फुडारपणा खाल पक्षान विस्वास निर्माण केल्लो. ताचे गैरहजेरेंत पक्ष कार्यकर्त्यांची उमेद उणी जावपाची शक्यताय आसा. जायते फावट एका पक्षाचें बळगें ताच्या फुडारपणाचेर जितलें आदारून आसता तितलेंच ताचे विचारसरणेचेरय आदारून आसता. देखून अचकीत हो निर्णय पक्षाची दिका आनी फुडले रणनिती विशीं गोंदळ निर्माण करपाक शकता.
गोंयांतलें राजकारण व्यक्तीमत्व केंद्रीत उरलां. जायते मतदार पक्षाचे विचारसरणे परस फुडाऱ्याचेर आशिल्ल्या विस्वासाचेर आदारून मतदान करतात. आरजी पक्षाचे बाबतींतय हीच परिस्थिती दिसली. मनोज परबाची प्रतिमा उग्रवादी, मुखार उलोवपी आनी तडजोड नाशिल्लो फुडाऱ्याची आशिल्ली. देखून फुडाराक हो पक्ष गोंयच्या राजकारणांत व्हड बदल घडोवन हाडूंक शकता अशें पक्षाच्या समर्थकांक दिसलें. पूण अध्यक्ष पद सोडले उपरांत निर्माण जाल्ली रिकामी सुवात भरप सोंपें न्हय. हाका लागून विरोधकांक पक्षाचेर टिका करपाची संद मेळूं येता आनी पक्षांत भितरले मतभेद वाडपाचीय शक्यताय आसा.
राजकारणांत संघर्श आनी चेंपण सतत आसतात. खास करून प्रादेशिक पक्षांक जायत्या अडचणींक तोंड दिवचें पडटा. अर्थीक साधनांचो उणाव, प्रसार माध्यमांची मर्यादीत प्रसिद्धी आनी व्हड पक्षांचो दबाव हाका लागून फुडारपणाचेर चड करून चेपण येतालो. पूण अशा वेळार फुडारपण तिगोवन दवरप चड गरजेचें. कारण लोकांचो विस्वास तिगोवपा खातीर सतत हाजीर रावप म्हत्वाचें. मनोज परबान अध्यक्ष आसतना संघटणा घटमूट केल्ली जाल्यार फुडाराक गोंयांत एक प्रभावी पर्याय म्हणून पक्ष चड बेगीन मुखार येवंक शकतालो.
ह्या निर्णयाचो सगळ्यांत चड परिणाम तरणाट्या वावुरप्यांचेर जावं येता. कारण कितलेशेच तरणाटे आशेन आरजी पक्षांत आयिल्ले. हो पक्ष पारंपरीक राजकारणाक आव्हान दितलो आनी थळाव्या प्रस्नांक प्राधान्य दितलो अशें तांकां दिसतालें. पूण पक्षाचो एक म्हत्वाचो फुडारी पद सोडटा तेन्ना वावुरप्यांक निराश जावप स्वाभावीक. कांय कार्यकर्ते निश्क्रीय जावपाची शक्यताय आसा, जाल्यार कांय जाण हेर पक्षांत वचूं येतात. हाका लागून संघटनात्मक लुकसान जावपाचो धोको आसता.
ते भायर गोंयच्या राजकारणांत प्रादेशिक पक्ष तिगोवन दवरप हें पयलींच कठीण मानतात. राश्ट्रीय पक्षांच्या प्रभावाक लागून थळाव्या पक्षांक सतत संघर्श करचो पडटा. अशे परिस्थितींत फुडारपणांत बदल वा अस्थिरताय पक्षाक घातक थारता. पक्ष उबारतना ताणें निर्माण केल्ली उर्जा आनी लोकांचो आदार तिगोवन दवरपाक मनोज परब हांचें सक्रीय फुडारपण गरजेचें आशिल्लें. ताणें संवादांतल्यान कांय मतभेद वा अडचणी सोडयले जाल्यार पक्ष चड प्रभावीपणान मुखार वचूंक शकतालो. पूण पद सोडले उपरांत लेगीत तो पक्षा खातीर काम करपाक शकता असो युक्तीवाद कांय समर्थक मांडपाक शकतात. पूण खऱ्या राजकारणांत ह्या पदाक प्रतिकात्मक म्हत्व आसता. अध्यक्ष हो पक्षाचो निर्णय घेवपी आनी प्रेरणादायी मानतात. देखून तें सोडल्यार पक्षांत गंभीर समस्या आसात असो चुकीचो संदेश लोकांक मेळूं येता. हाचो परिणाम फुडले वेंचणुकांनीय दिसूं येता.
एकूणच मनोज परब हांणी आरजी पक्षाचे अध्यक्षपद सोडप हो भावनीक आनी राजकी नदरेन व्हडलो धपको मानतात. ताणें तरणाट्यांचेर घाल्लो विस्वास आनी गोंयचे अस्मिताये खातीर सुरू केल्ली चळवळ ह्या सगळ्यांक घटमूट फुडारपणाची गरज आशिल्ली. देखून हो निर्णय पक्षाचे वाडीक आडखळ जावंक शकता. गोंयच्या प्रादेशिक राजकारणांत बदल घडोवन हाडपाची तांक आशिल्ल्या ह्या पक्षाक म
नोज परबाचें फुडारपण खूब म्हत्वाचें आशिल्लें.
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
