भांगरभूंय | प्रतिनिधी
मुंबय, खबरां संस्थाः ड्रग्स तस्करी आड व्हड कारवाय करून महसूल गुप्तचर संचालनालयाच्या मुंबय विभागीय पंगडान छत्रपती शिवाजी महाराज आंतरराष्ट्रीय विमानतळार दोन कारवाय केल्यो. ह्या कारवायांनी सुमार 11.25 कोटी रुपयांचें 2.25 किल ग्रॅम कोकेन जप्त केलां. कुडींत लिपोवन ड्रग्साची तस्करी करपी चार परदेशी नागरिकांक ताब्यात घेतले.
मेळिल्ले म्हायती प्रमाण, 22 मे 2026 दिसा मुंबयच्या छत्रपती शिवाजी महाराज आंतरराष्ट्रीय विमानतळार आदीस अबाबा सावन आयिल्ली एक बायल आनी एका दादल्या प्रवाशाक डीआरआय अधिकाऱ्यांनी ताब्यांत घेतले. चवकशी वेळार दोगांय प्रवाशांनी तस्करी करपा खातीर अमली पदार्थ आशिल्लीं कॅप्सूलां गिळिल्ल्याचें कबूल केले. उपरांत तांकां रोखडेंच लागसारच्या सरकारी हॉस्पिटलांत दाखल केले आनी थंय तांचे कडल्यान वट्ट 84 कॅप्सूल जप्त केल्यात. बेकायदेशीर बाजारांत सुमार 7 कोटी रुपया किमंत आशिल्ले 1.40 किल ग्रॅम कोकेन मेळ्ळे.
हाचे आदींचे कारवायेंत 19 मे 2026 दिसा डीआरआयच्या अधिकाऱ्यांनी आदीस अबाबा सावन मुंबयच्या छत्रपती शिवाजी महाराज आंतरराष्ट्रीय विमानतळार देंविल्ल्या आफ्रिकन दादलो आनी बायल प्रवाशाक ताब्यांत घेतिल्ले. चवकशे वेळार दोनूय प्रवाशांनी अमली पदार्थ आशिल्लें कॅप्सूल गिळिल्ल्याचें कबूल केल्ले. तांचे कडल्यान वट्ट 63 कॅप्सूल जप्त केल्ले. बेकायदेशीर बाजारांत सुमार 4.25 कोटी रुपया किमंत आशिल्ले 850 ग्राम कोकेन जप्त केल्ले.
डीआरआय ड्रग्स मुक्त भारत करपाच्या संकल्पांत खर आसा आनी ड्रग्स वेव्हार आडावप, आंतरराष्ट्रीय तस्करांचे जाळें मोडून उडोवप, देशाची भलायकी, कल्याण आनी सुरक्षेची राखण करपाचे सेगीत यत्न करीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
