भांगरभूंय | प्रतिनिधी
पणजी : आमच्या देशांत खंयचीय नोकरी मेळोवपा खातीर वा वेवसायिक जावपा खातीर उण्यांत उणी पात्रताय आसप गरजेचें. तशेंच शिक्षक, सरकारी अधिकारी आनी हेर व्यक्तींक प्रशिक्षण दितात. तेच प्रमाण राजकारणांत प्रवेश मेळोवपा खातीर उण्यांत उणी पात्रताय वा पूर्व प्रशिक्षण गरजेचें आसता. गोंयच्या एका आमदाराक स्वताची सय लेगीत करपाक येनाशिल्ली ही दुर्दैवी गजाल अशें मत केरळचे राज्यपाल राजेंद्र आर्लेकार हांणी उक्तायलें. शेनवारा नॅशनल युथ पार्लमेंट वतीन आयोजीत केल्ले कार्यावळींत ते उलयताले. ह्या वेळार राज्यपाल अशोक गजपती राजू, मंत्री सुभाष फळदेसाय हाजीर आशिल्ले.
आर्लेकार हांणी सांगलें, सरकारी कार्यालयांत वा हेर खंयच्याय सुवातेर शिपायेची जरी नोकरी आसली तरी उमेदवारान धावेचें शिक्षण पुराय केल्लें आसूंक जाय. पूण राजकारणा खातीर असो कसलोच नेम ना. म्हज्या राजकी कारकिर्दींत निरक्षर लोक आमदार आनी मंत्री जाल्यात तें पळयलां. राजकारणांत येवपी तरणाट्यांनी देशाचो इतिहास आनी वर्तमानकाळ जाणून घेवन फुडाराचें फुडारपण करतले अशी अपेक्षा आसता. ते खातीर तांकां उण्यांत उणी शिक्षणीक पात्रताय आसपाक जाय. दुर्दैवान आमचे कडेन बरे राजकारणी तयार करपाची वेवस्थाच ना.
पूण फाटल्या कांय वर्सांत सकारात्मक बदल घडत आसात. प्रधानमंत्री नरेंद्र मोदी हांणी एक लाख तरणाट्यांक राजकारणांत प्रवेश करपाचो उलो केला. सध्या कांय शिकिल्ले तरणाटे राजकारणांत प्रवेश करतात. मुंबयची रामभाऊ म्हाळगी सारक्यो संस्था शिकिल्ले राजकारणी तयार करपाक वावुरतात अशेंय तांणी सांगलें.
युथ पार्लमेंट कडल्यानय अशीच अपेक्षा आसा. हे संस्थेन तरणाट्यांक संसद आनी विधानसभेचे कार्यपद्दतीची म्हायती दिवची. तरणाट्यांक समस्या सोडोवपाचे आसल्यार फकत भायर बसून प्रतिक्रिया दिवचे परस हे पद्दतींत वांटो घेवपाची गरज आसा. तुमी वेवस्थीत आसल्यारूच बदल करप शक्य आसा.
लोकशायेंत मतभेद आसप ही सैमीक गजाल. आमच्या देशाचे खरे बळगें सदांच विविधतायेंतल्या एकचारांत आसा. आमच्यो भासो, चालीरिती आनी प्रदेश वेगवेगळे आसले तरी संविधानाच्या आदर्शांनी आमी सगळे एकठांय आसात. सत्य, प्रामाणीकपण, शिस्त आनी राश्ट्रसेवेच्या भावनांनी प्रेरीत जावन तरणाट्यांनी सदांच मुखार वच्चें अशें राज्यपाल अशोक गजपती राजू हांणी सांगलें. आपले गिन्यानान फकत तुमच्या वैयक्तीक उदरगतींत न्हय, तर भौशीकांच्या बऱ्या खातीरय योगदान दिवपी आसूंक जाय.
मुखेल विशय सोडून हेर विशयांचेर उलयताले आमदार
राजकारण्याक एका विशयाची खोलायेन म्हायती आसपाक जाय. हाका लागून विशय स्पश्टपणान मांडप शक्य जाता. गोंय विधानसभेंत हांव सभापती आसतना थंयचे कांय आमदार एका विशयाचेर उलोवपाची परवानगी मागताले. पूण परवानगी दिले उपरांत ते मुखेल विशय सोडून हेर विशयांचेर उलयत रावताले. अचूक आनी खोलायेन म्हायती नाशिल्ल्यान अशें घडटालें अशें राजेंद्र आर्लेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
