भांगरभूंय | प्रतिनिधी
युनिफॉर्मांतली खंडणी: अटक जावपाची भिरांत घालून गुन्यांव फांट्यान वसूल केली एक कोटींची खंडणी
म्हापशेंः जबरदस्ती, खंडणी आनी पुलीस अधिकारांचो गैरवापर ह्या आरोपांक लागून वादग्रस्त जाल्ल्या आसगांव-हणजुणां जमीन वादाच्या प्रकरणांत उत्तर गोंयच्या मुखेल जिल्हो आनी सत्र न्यायालयान वेवसायीक एस. बी. ताम्हणकार हांकां अंतरिम अटकपूर्व जामीन मंजूर केलो.
दोनूय वटांचो युक्तीवाद आयकून अर्जदाराक अटक जाल्यार 50 हजार रुपयांच्या वैयक्तीक हमी रक्कमेचेर आनी त्याच रकमेच्या एका हमीदाराचेर तांकां सोडपाचो अशें निर्देश न्यायालयान दिले. तशेंच पूर्व परवानगी बगर गोंया भायर वच्चें न्हय आनी 22 जून 2026 दिसा फुडले सुनावणेक न्यायालयांत हजर रावपाचे आदेश दिल्यात.
ताम्हणकार हांणी गोंयच्या पुलीस महासंचालकांक संबोधीत करुन बरयिल्ल्या कागाळींत केल्ल्या धक्कादायक आरोपांच्या फांटभूंयेर ह्या अंतरिम अटकपूर्व जामीनाच्या घडामोडीक खासा महत्व मेळ्ळां. हे कागाळींत तांणी गुन्यांव फांट्याचे पुलीस अधीक्षक, कांय पुलीस अधिकारी आनी खाजगी लोकांचेर गुन्यांवकार तपासाच्या नांवान कथित खाकी वर्दींतलें (युनिफॉर्म) खंडणीचें रॅकेट चलयतात असो आरोप केला.
कागाळी प्रमाण, हो वाद आसगांव आनी हणजुणां सारकिल्ल्या रियल इस्टेट वाठारांनी आशिल्ल्या चड मोलाच्या जमनीच्या वेव्हारांतल्या सुरु जालो. जंय व्हड प्रमाणांत अर्थीक देवाण-घेवण, एडवान्स पयशे आनी वाटाघाटी जाल्ल्याचे तांणी कागाळेंत म्हणलां. ताम्हणकार हांचो अशो युक्तिवाद आसा की, मुळांत दिवाणी (सिव्हिल) आनी वेवसायिक स्वरूपाचो आशिल्लो हो वाद, फकत पयशे वसूल करपा खातीर बेकायदेशीर दबाव हाडपाच्या हेतान मुद्दाम फौजदारी (गुन्यांवकार) प्रकरणांत रूपांतरित केला.
7 मे 2026 दिसा गुन्यांव फांट्याच्या अधिकाऱ्यांनी तांकां जामीन नाशिल्ल्या वॉरंटाची अंमलबजावणी करपाचें निमित करून रायबंदरांतल्या गुन्यांव फांट्याच्या पुलीस स्टेशनांत हाडलो, जरी तपास एजन्सी कडेन पयलींच दखलपात्र गुन्यांवांनी अटक करपाचो अधिकार आशिल्लो. थंय ताका कितलींशीच वरां बेकायदेशीर रितीन दवरलो, बंदखणींत घालापची धमकी दिली आनी खाजगी व्यक्ती आनी तांच्या वकिलांच्या हाजिरेंत ताचेर चेपण हाडले असो दावो तांणी आपल्या कागाळींत केला.
भंय घालून हमीपत्रांचेर सय करपाक लायली आनी 1.20 कोटी रुपयां परस चड मोलाचे जायते पोस्टडेटेट चेक जारी करचे पडटले अशें सांगलें असो आरोप ताम्हणकार हांणी केला. तशेंच बंदखणींतलो छळ आनी अटक जावची न्हय म्हणून तांचे कडल्यान पांच लाख रुपया वसूल केले.
हे कागाळींत ताणें आपल्या आदल्या वकिलाचेरूय आरोप केला, सगळी हमीपत्रां आनी धनादेश जबरदस्तीन मेळयल्यात अशें ठाम मत आसून लेगीत वकिलांनी ताच्या संमती बगर न्यायालयांत निवाड्या विशीं अनधिकृत विधानां केल्यांत.
खंडणी, गुन्यांवकारी भंय घालप, बेकायदेशीर ताब्यांत घेवप, गुन्यांवकारी कट रचप आनी अधिकृत पदाचो गैरवापर करप ह्या गुन्यांवां खातीर गुन्यांव फांट्याचे पुलीस अधीक्षक, संबंदीत पुलीस अधिकाऱ्यां आड आनी तांच्या कथीत सहकाऱ्यां आड गुन्यांव नोंद करुन कारवाय करची अशी मागणी ताम्हणकार हांणी महासंचालकां कडेन केल्या.
ताम्हणकार हांणी आपल्या अटकपुर्व जामीन अर्जांत हे कागाळीचो सविस्तर उल्लेख केला. ह्या प्रकरणाची फुडली सुनावणी 22 जून दिसा सत्र न्यायालयांत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
