भांगरभूंय | प्रतिनिधी
पणजीः कोंकणी लेखक, शिक्षक, अभिनेते संजय श्रीपाद सिनाय तळवडकार (72, मूळ देऊळमळ, केपें, सध्या सपना सिटी, पावर हावस, मडगांव) रातीं संवसाराक अंतरले. तशेंच कला आनी संस्कृती खात्याचे आदले संचालक, दयानंद कला केंद्राचे अध्यक्ष मोर्तू उर्फ एम व्ही नायक भायर पडले. मोर्तू नायक हांचेर आयज 23 मेक दनपरां 12 वरांचेर आनंदवाडी, सांवड्ड्यां निमणे संस्कार जाले. तर संजय तळवडकार हांच्या पार्थिवाचेर सांजवेळा ४ वरांचेर मडगांवां निमणे संस्कार जाले.
आयज निमणे संस्कार
संजय तळवडकार हांसमुख सभाव आनी मोगाळ व्यक्तिमत्व हाचे खातीर वळखताले. ताणें आपल्या विनोदी शैलीन लेखनाच्या मळार नांव जोडिल्ले. ‘सुनापरान्त’ दिसाळ्यांतल्या अन्न संस्कृतायेचेर आदारिल्लो तांचो स्तंभ वाचप्यां मदीं खासा लोकप्रिय जाल्लो. घोस्त, भूस बरो दीस बरो ही तांची पुस्तकां खूब लोकप्रीय जालीं. विनोदी स्तंभ लेखना खातीर ते प्रसिद्ध आशिल्ले.
विद्यार्थी काळा सावन नाट्य मळार तांणी उल्लेखनीय कामगिरी केल्ली. नाटकांतलो अभिनय आनी योगदाना खातीर तांचो भोवमान जाल्लो. शिक्षक म्हणून ताणें जायत्या विद्यार्थ्यांकय प्रेरणा दिली. तांची कूड सांजेच्या 4 वरांचेर पावर हावस, आके, मडगांवच्यान निमणे संस्कारा खातीर व्हरतले. मडगांवच्या पाजीफोंड हांगाच्या मठग्रामस्थ हिंदू सभेच्या मसणभुंयेंत निमणे संस्कार जाले.
पिराय 72 वर्सां आसूनय ‘संजय’ म्हण पाचारपा इतलो तो तरणाटो जातालो. सगळ्यांकूच हेंच जमना. काळान म्हजो एक लागींचो इश्ट व्हेलो. संजय बाबाच्या विद्यार्थ्यांक, साहित्य आनी नाट्य-रसीकांक आयज अमर्याद दुःख जालां. म्हजे जिणेंत हांवें संजय बाबाच्या काळजांत इश्टागतीची सुवात लाबिल्ले कितलेशेच नशिबवान पळयले. तातूंतलोच हांव एक. कोणाकूय केदोय ‘स्ट्रेस’ आसल्यार दोतोरान संजया कडेन ‘धा मिनटां उलय’ अशें प्रिस्क्रिप्शन बरयल्यारूय उपकारतालें. संजयबाब एक आमीग, एक कलाकार, एक लेखक, एक वक्तो आनी विद्यार्थीप्रिय शिक्षक म्हण सदांकाळ अज्रंवर उतरलो. युवा महोत्सवांत ‘मुस्तायकी’ आनी ‘प्रस्नमाची’ कार्यावळीच्या निमतान यांचे वांगडा सारिल्ले खीण… म्हजे खातीर भांगराळी जोड. जिणेंतल्या साबार दुखण्यांवयली ‘संजय-थेरपी’ ना हें वास्तव. ताचो उणाव सोंसपाचें बळगें ताच्या घरच्यांक आनी आमकां सगळ्यांक लाबूं हीच इत्सा.
प्रो. डॉ. राजय पवार
(लेखक – कलाकार)
कोंकणी भाशा मंडळाचे आदले सचीव आनी कोंकणीचे सक्रीय वावुरपी संजय तळवडकार हांका अचकीत मरण आयिल्ल्यान कोंकणी भाशा मंडळांन आनी अखिल भारतीय कोंकणी परिशदेन दुख्ख उक्तायलां. एक हांसतें आनी सगळ्यांक हांसोवपी व्यक्तीमत्व म्हणून संजयाक सगळें गोंय वळखतालें. विनोदी लेखक, नाट्य आनी सिने कलाकार म्हणून तांणी नामना जोडिल्ली. तांचें घोस्त आनी भूस बरो दीस बरो ह्यो दोन विनोदी साहित्य कृती उजवाडाक आयल्यात. ते मूक नाट्य प्रकाराचे अभ्यासक आशिल्ले. ह्या विशयाचेर तांणी साबार कार्यशाळा घेतल्यात.
ते एक वाचक आनी अभ्यासक आशिल्ले. केंपेच्या होलीक्राॅस इन्स्टिट्यूट हे शाळेचे ते मुख्याध्यापक म्हणून निवृत्त जाल्ले. शणै गोंयबाब कथामाळ तशेंच गोवा युवा महोत्सवांच्या आयोजनांत तांचे मार्गदर्शन लाभतालें. तांच्या अचकीत मरणान कोंकणी भाशा मंडळान आनी परिशदेन एक निश्ठावंत कोंकणी कार्यकर्तो वगडायलो अशा उतरांनी दोनुय म्हालगड्या संस्थांनी तांकां आर्गां ओपल्यात .
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
