भांगरभूंय | प्रतिनिधी
परबाच्या राजिनाम्याक जालीं 24 वरां, बोरकाची अजून प्रतिक्रिया ना
भांगरभूंय । प्रतिनिधी
पणजी : मनोज परब हांणी अध्यक्ष आनी पक्ष वांगडीपदाचो राजिनामो दिवन 24 वरां जालीं, पूण विरेश बोरकार हांचो अजूनय पत्तो ना आनी कसलीच प्रतिक्रिया ना. सद्या विरेश बोरकार हे पक्षांत रावतले काय मनोजा भशेन पक्ष सोडून वेगळी वाट धरतले असो प्रस्नचिन्न सद्या तयार जालां. मजगतीं, विरेश बोरकार हे संपर्कांत नाशिल्ल्याचें आरजीपीचे कार्यकारी समितीन सांगलां.
पक्षांत अंर्तगत राजकारण सोंसपा भायर जाल्ल्याचें सांगून आरजीपीचे सुप्रिमो हांणी अध्यक्षपदा सयत संस्थापक वांगडीपदाचो राजिनामो दिवन राजकारणांतल्यान संन्यास जाहीर केल्लो. राजिनामो दिले उपरांत परब हांकां लोकां कडल्यान खूब सहानभुती येवपाक लागल्या. व्हडलें काळीज दवरून तांणी हो निर्णय घेतिल्ल्याचें सांगून अश्या कठीण काळांत परब हांणी पक्ष सोडून वच्चे न्हय, अशी प्रतिक्रिया लोकां कडल्यान आयल्या.
मजगती, हे घडामोडीचेर विरेश बोरकार हांणी कसलीच प्रतिक्रिया दिवंक ना. ते अजूनय शांत आसात. परब हांच्या राजिनाम्या उपरांत विरेश हांचे ‘चुप्पी’चेर लोक आता प्रस्नचिन्न उप्रासपाक लागल्यात.
परब हांच्या राजिनाम्या उपरांत ‘भांगरभूंय’न विरेश बोरकार हांकां कितलेशेच खेपे संपर्क करपाचो यत्न केलो. पूण तांचो फोन बंद येतालो. तशेंच तांचे सहकारी लेगीत उलोवपाचे मनस्थितींत नात.
हे विशीं अदीक म्हायती दितना आरजीपीचे भांडारी अजय खोलकार हांणी सांगलें, बोरकार हांणी कार्यकारिणी समिती कडलो संपर्क सामकोच तोडला.
बोरकार हांणी कसलीच अपडेट आमकां दिवंक ना. तांणी मेल, व्हॉट्सअॅपाचेर धाडिल्ल्या संदेशाक कसलोच प्रतिसाद अजून मेरेन दिवंक ना. बोरकार खंय आसात ते लेगीत आमकां खबर ना. सद्या दिसाळ्यांचेर येवपी बातम्यांच्या आदारांचेर तांची खबर आमकां कळटा, अशें खोलकार हांणी सांगलें.
पक्ष फुडें व्हरतलो जाल्यार तांचे कडल्यान आमकां स्पश्टीकरण जाय. तशेंच बोरकार हे समितीचे वांगडी आसात आनी तांचे बगर नवो अध्यक्ष वेंचप शक्य ना. बोरकार हे उलयले जाल्यारच आमी फुडें वचपाक शकतात, अशें खोलकार हांणी म्हणलें.
मजगती, परब हांणी राजिनामो दिले उपरांत आरजीपी मदले प्रत्यक्ष राजकारण न्हिवलां. पूण सोशल मिडियाचेर परब हांच्या समर्थकांनी राजकारणाचो उजो पेटत दवरला. परब हांच्या समर्थकांनी बोरकार हांचे पोरणें व्हिडियो सोशल मिडियाचेर नेटान शॅअर केल्यात. तातूंत आमदार म्हूण वेंचून येतकत एके मुलाखतींत उलयतना सांगलां, मनोज परब तांचे गुरू, पूण ते विधानसभेंत म्हजे बरोबर नात म्हूण दुख्ख दिसता. 2027 त मुख्यमंत्री जावन तांकां हांव गुरूदक्षिणा दितलों, पूण परब हांच्या समर्थकांनी एक वेगळोच अर्थ घेतला. विरेशाक पयलींच सत्ता जाय आसली आनी तांणी आतां आपली गुरूदक्षिणा परब हांकां दिल्या.
मुख्यमंत्र्याचे विधान योग्य
आरजीपी भितर धर्माचें आनी जातीचें राजकारण जालां, हो मुख्यमंत्र्यान केल्लो आरोप न्हय, जाल्यार हें आमचेर विधान जें मुख्यमंत्र्यान अधोरेखीत केलां. हाचेय पयलीं धर्माचें राजकारण जाल्ल्याचें आमी मान्य केलां. पक्षा भितर अशे कांय समाजकटंकी लोक आसले जे हिंदू- क्रिस्तांव करून शिवाजी, गोमाता, परशुराम हांचेर आक्षेपार्ह पोस्ट घालताले. ह्या कारणाक लागून पक्षान तांचेर कारवाय लेगीत केल्या, पूण त्या लोकांक विरेश बोरकार हांचें समर्थन आसा, अशें खोलकार हांणी सांगलें.
बोरकार बंगळूरा
ह्या वादाक लागून विरेश बोरकार हांची भलायकी खूब इबाडिल्ली. देखून ते बंगळूर उपचारा खातीर गोंया भायर गेल्ले. चर्चा करपा खातीर आमी विरेश हांकां खूब विनवणी केल्ली. पूण ते आयकून घेवपाक तयार नात. तो कसले तरी गजालीन खूब दुखावला, हे खातीर तो उलोवपाक सोदिना. ही गजाल कितें ती आमकां लेगीत सांगूंक ना, अशें बोरकार हांच्या समर्थकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
